Aizawl: BJP Mizoram chuan kumin MLA inthlan lo awm tura an party manifesto lungphum tur, Programme Comprehensive Assistance & Rehabilitation of Economy (CARE) an puang.
Nimina an party pisa-a political session-ah BJP Mizoram President Vanlalhmuaka chuan BJP Mizoram Vision Document/ Manifesto innghahna lungphum tur, Mizoram retheihna lak ata chhanchhuahna tur programme, CARE chu Rs 5,00,000-a bul tanpuia mi retheite khaichhuah an nih tur thu a puang.
BJP Mizoramin CARE an sawi fiah dan chuan hlawm hnihah then a ni a. Mi tinin an mamawh ang hmasawnna an hmuh theih nana hmalak leh an mamawh ang thlensak te leh mi harsa, Mizorama chhungkua nuai khat hnenah cheng nuai ngaa mi retheite bul tanpuia khai chhuah chu a tum a ni.
CARE scheme hnuaiah hian tumah thlei bik nei lovin, tih takzet a dinchhuah duhte chu Rs nuai ngain bul a tanpui dawn a ni.
CARE scheme hlawhtling taka puitlinte chuan lian zawka an kal chhoh zel theih nan Rs nuai 10 thleng loan ruahmansak an ni ang a. Hei bakah pawlho (society & firm, etc), anga hmalakna kalpui theih a ni bawk ang a, an thil tum (project) azirin Rs nuai 30/100 thleng loan+grant pek theih a ni bawk dawn a. Interest Subsidy CARE Bank Central Scheme buaipuisak dawn bawk.
BJP Mizoramin sorkarna an chang a nih chuan kum 2023-2028 chhungin leiba hi zaa paliah an tihhniam tur thu te, kum nga dang lehah chuan ba nei lo mai ni lovin, surplus neiin central sorkar sum ei raltu ringawt ni lova thawk chhuaktu nih ve an tum dawn niin an sawi bawk.