- Laldawngliana
Mahmuaka Chhakchhuak ziak Hringnun Hi tih hi nikum 2022-a chhuak tawh daih ni mah se tun hnaiah ka lo chhiar ve chauh a. Amah hi thu ziak taima tak a ni a, a khat tawk hian a thu ziak chhiar tur hi chanchinbuah a awm reng mai. He lehkhabu hi thu ziak chi hrang hrang, thupui pakhat hmang sia ziak 31 khung khawmna a ni a. Phek 122-a chhah a ni a, lehkha chhiar taima vak lo tan pawh a zuamawm tawk viau a ni. A lehkhabu tihchhuah hmasak ber a ni na a chhut sual hi a vang pharh hian a taimakzia a tichiang hle. A kawm pawh a thain a mawi a, lung a tileng hle mai.
A bu han keu ila a chhung thu awm te han thlir hian a dangdai a. A bu hming chu a thu ziak hrang hrang thupui ah a hmang a, Hringnun Hi-1, Hringnun Hi-2 tiin a dah vek a. Thupui inang mah se a chhung thu erawh chi hrang hrang a ni thung. Book of The Year 2021-a thlan Hnam Ropuite U Tho Ru tih Lalhruaitluanga Chawngte ziak kha min hriat chhuahtir lo thei lo a ni. Ani chuan zawnawlnaah chuan thupui hming dah lovin a dah awl a, phek nambar a dah leh mai a. A chhungah erawh chuan an tihdan hi a inang a; a bu hming chu an thu ziak hrang hrang thupui hming ah an vuah ve ve a ni.
Thuhmahruaia a sawi angin hringnun hi ‘ziah kim sen a ni lo a, ziah zawh sen chi pawh a ni lo’ a tih angin hriat kim sen a ni lo va, ziah kim theih lah a ni hek lo. Kan ni tin hun hman dan theuh hi kan hringnun chu a ni mai a, kan hringnun hman dan lah a hrang thliah bawk si.
A thu ziak tawpah hian a ziah hun a dah thlap zel hi hriat a nuam hle. January 4, 2018 leh January 7, 2018-ah hian ni khatah thu pahnih a ziak a. Ni khata thu hran daih ziah hi thil harsa tak a ni a, ani chuan a ti thei a nih hi! A ziak hmasak dan indawtin he lehkhabuah hian a dah a, tichuan January 4, 2018 atangin October 24, 2021 inkara a ziak te an ni a. A ziak hun han en chian hian 2018-ah 18 a ziak a, 2019-ah 8, 2020-ah 7 leh 2021-ah 4 a ni a. A ziak hun han en hian a zuih telh telh niin a lang a, thil dang tha zawk a lo er vang a ni ang e; 2023 August thla tawp lamah lehkhabu tha zet Ram Kalsiam tih a tichhuak leh ta hlauh a nih hi.
He lehkhabu han chhiar hian a then chu a ziaktu tawn ngei atanga ziak a ni a, a thenkhat chu mi dang chanchin atanga a ziak te pawh a ni thung. A thu ziak han chhiar hian Mizote a hmuh dan te, kohhran a ngaih dan te kan hmuh rualin hun hman that a tul thu te, ram leh hnam a vei dan te, ringtu nun dan tur te min kawhhmuh bawk a. A thu ziak tin hi Mizoten kan mamawh em em vek a ni.
Thil han sawi dan tawk pawh a thiam hle a. Police station-ah mi pakhat riak thin a zawh chian chuan, “Chhungte chu nei e (an veng hming a sawi a),” tiin a ziak duh tawk mai hi a him chin a hria ka ti. A chhiartute tan chuan a veng hming hriat kher chu a tangkaina pawh a awm lo reng a ni.
Hnam Ropuite U Tho Ru tih ka chhiar kha chuan thu ziak tinah thupui inang a dah kha ka lo chik lem lo a, ka rilru ka lo seng lo deuh a ni ang. Tunah thupui atan Hringnun Hi tih a ni leh vek a, mahse ka chhiar chhung zawng chu a thu nena inrem tur a thupui awm hi ka lo ngaihtuah reng lo thei lo. A ziaktuin rilru chawl lova a chhiartu min siam thiamna hi a themthiamna tak pawh a ni a. Chubakah chuan a hnuaia rina chhinchhiah duh lah ka ngah a, a sawi belh duh leh ka ngaih dan nena inang lo te, ziah belh ka duh chu a phek sir awl remchang lai laiah ka ziah duh a, ka duh aiin a phek sir awl pawh a zim mah mah a ni. He lehkhabu zet hi zawng ngaihtuahna min sentir thei lehkhabu tha tak a ni.
“… a ropui dan a ropui vak lo a ni,” a tih te, “Risk vekin hun leh ni kan hmang a. Risk fuh chu a hlawhtling a; risk fuh lo chu a hlawhchham a ni mai,” tih te, “Hmui hmer hmeh lo mah sela an puar tho,” tih te, “Hausa tlak lo mihring leh malsawmna dawng tlak lo mihring hi kan awm ve bawk,” a tih te hi ngaihtuah zui tlak tak a ni. Vaihoin, “Mizo chu an ei ru ang chu, Kristian an ni alawm,” a ti hian min khei na hle mai. Hmanlai atangin Mizote chu hnam rinawm kan inti thin a; Kristian lah dik leh thianghlim taka nung tura inzirtir reng kan ni a. Chumi pahnih Mizo leh Kristianna infawkkhawmin a siam Mizo Kristian chhe lutuka min hmu chu a na ngaih ngaih hle mai. Chutih rualin min hmuh dan hi a dik lo tia inpha hul mai thei kan ni lo. Vai ho chuan tho fukna a pan lai an hmu a ni mai. He lehkhabua a ziaktu duh angin nung thei ila chuan Vai min hmuh dan pawh a dang daih tur a ni.
He lehkhabu hian hringnun hi kawng hrang hrangin min thlirpui a. A changin min titipui a, a changin min fuih a, a changin mi tihdan tha min kawhhmuh a, a changin min cho phur a tum a, Mizo nun tha lai te min hrilh bawk a. Mihring hi kan theihna leh thiamna a inchen vek lo va, kan khawsakna lahin a zir lo thei. Chuvangin he lehkhabu hi chuan pakhatna ni vek tur leh mi ropui tak ni tur hian min beisei vek lo, kan thlen chin atanga hmasawn turin kawng hrang hrangin hringnun min thlirpui a, nun dan tur min kawhhmuh zawk a ni. Heng min kawhhmuh, hmasawnna rahbi hre tur chuan Hringnun Hi tih hi chhiar ngei a ngai a ni. Chuvangin he lehkhabu hi a la chhiar lo tan chuan chhiar ngei ngei chi a ni.