Saipum khuaa in hmun nei lote tana Serlui bialtu MLA Lalrinsanga Ralte-in a hlawh atanga in hmun a leisak chhungkaw 30-te hnenah hlanna hun Ningani khan neih a ni.
In hmun hlanna inkhawmah Lalrinsanga Ralte chuan in hmun nei loten an nei thei tur chu a lawmpui thu leh thlan chhuah zinga la tel ve lo, la nei lote pawh an mamawh dan ang zel a ngaihtuah chhunzawm zel a tum thu sawiin, “Mi harsa leh rethei zawkte chhawmdawla khaichhuah hi ka tum ber a ni,” a ti.
Serlui bialtu MLA hi an khaw tana hmasawnna hrang hrang a thlen avang leh in hmun nei lote tan inhmun a leisak avangtea lawmthu sawi nan Saipum Village Council huaihawtin Saipum Zero Point-ah bialtu MLA Lalrinsanga Ralte hi ropui taka lo hmuakin an zawn a ni.
In hmun nei lote tana inhmun an pek turah hian a dawngtu tur dik takten an dawn theih nan Saipum VCP kaihhruaina hnuaiah Committee din a ni a. He committee-ah hian Saipum All NGO leh all party aiawh te an tel kim vek.
Hemi hnu hian Saipum Village Council House thar chu bialtu MLA hian a hawng nghal bawk.