Aizawl: Kumin MLA inthlan lo awm tura Kolasib biala Congress party candidate ni tura an dah chhan chu a tan ni lovin, Kolasib bial mipuite leh Mizoram tana ding a nih vang niin Mizoram Pradesh Mahila Congress Committee (MPMCC) President Vanlalawmpuii Chawngthu chuan a sawi.
Nimina Kolasib Block I Congress Committee-in Tashi Delek Conference Hall, Kolasib Venglaia intuaitharna hun hmanpuitu, Vanlalawmpuii Chawngthu chuan mi tam takin Kolasib bial hi Congress candidate nih huphurhawmna tak turah sawipui thin mah se, Congress worker-te hmel leh chevel a hmuh hian bial din châkawm ber bial a ni zawk tih a taka a hmuh thu a sawi.
Vanlalawmpuii Chawngthu chuan Kolasib bial hmasawnna tura thlan tlin a nih chuan khawtual mite entawn tur leh hmahruaitu ni tura nasa takin hna a thawk dawn tih sawiin, “Kolasib biala hotuten min dah chhan chu ka tan ni lovin, Kolasib bial mipuite leh Mizoram tana ding ka ni a. Chuvangin, nangni pawhin he Kolasib bial tan hian campaign rawh u,” a ti.