Kum 2018-a Indonesian thlawhna tla ta, Lion Air thlawhna chu an chhui zui zel a. An tlak hmaa a thlawh hnuhnung ber, Bali thliarkara Denpasar atanga Jakarta pana a thlawh laiin a thlawh chhuah chiahin technical lamah harsatna tawkin pilot hian control tower a bia tih hriat chhuah a ni.
An tlak hma nia a thlawh lai hian an thlawk chhuak chiah tihin khawl lam harsatna neiin tum a dil leh a; mahse, a hnu lawkah Jakarta an thlen theih tur thu sawi lehin him takin an thleng a. A tuka an thlawh chhuah lehah mi 189 chuangin tuiah an tla a, tun thlengin an chinchang hriat mumal theih a la awm lo.
Bali-Nusa Tenggara huam chhunga airport authority-a an hotu, Herson chuan an tlak hma nia thil thleng hi nimin khan a sawi chhuak a. “Captain khan a buai thu a sawi hnu lawkah a thlawh zui theih inringin a thlawk tlang ta a ni,” a ti.
An inbiakna thawk hi thlawhna dang, an thlawh chhuah hnu chiaha tum khalhtu (pilot) pawhin a lo hriat/man ve thu a sawi bawk.
Denpasar-Jakarta flight hi Indonesian khawpui tumhmunah hian anmahni sanaa Pathianni zan dar 10:55-ah a tum a. He thlawhna vek, Boeing 737 MAX hi a tuk zing dar 6:20-ah Bangka island, Sumatra pana chhuak lehin a thlawh chhuah atanga minute 13 hnuah tuipuiah a tla ta a ni.
Lion Air thupuangtu chuan thlawhnaa buaina awm saa thlawk anga sawina hi a phain a hmain buaina an neih avanga pilot-in lei lam a bia nia sawina chu chhangin, “Kan thlawhna tlak chhan hi kan chhui mek a ni,” ti chauhvin a chhang a ni.
Indonesia-a thlawhna chuan man tlawm zinga lian ber, Lion Air-a an CEO, Edward Sirait pawhin a hmain thlawhnaah hian technical problem an neih thu hi a sawi a; mahse, Denpasar-Jakarta flight hnuah hian hei hi an siam tha tih a lo sawi tawh bawk.
Hetianga titi a awm avang hian transport minister chuan Lion Air technical director leh officer dang pathum chu a lo suspend tawh.