Aizawl: MINECO-a Gauhati High Court, Aizawl Bench building thar chu Inrinni khan Chief Justice of India, Justice Dhananjaya Y Chandrachud-a’n a hawng.
Building thar hawngtu, Justice Chandrachud-a chuan ram inrelbawlna kawngah court hian mawhphurhna pawimawh tak a luah avangin a hmunhma tha, thawktuten felfai taka hna an thawh theihna neih a pawimawh a. Amaherawhchu, a hmunhma tha aia pawimawh zawk la awm chu democracy innghahna lungphum pawimawh, dan hmanga rorelna (rule of law) dinpui a nih thu a sawi.
CJI chuan Aizawl Bench building thar pawh hian he ram hi dan hmanga enkawl a nihzia a tifiah a, dan hmanga rorelna hi he ram chelh nghehna pawimawh tak a nih thu a sawi a. Gauhati High Court hian danglam bikna tak a neih pakhat chu state pali huamah hna a thawk hi a ni a, a mawhphurhna hi a pawimawh em em a, tuna hawn tharm Aizawl Bench building thar pawh hian nasa takin hma a sawn zelna turah a thawhhlawk hle dawn niin a sawi.
Chief Minister Zoramthanga pawhin thu sawiin Mizoram chu India-in separation of juduciary a kalpui khan hmarchhak state-a a taka kalpui hmasatu a nih thu a sawi a. Hetiang bawk hian Lok Ayukta a lo chhuah leh pawhin Mizoram chu hmarchhaka a kalpui hmasatu ni leh tih a sawi.
Zoramthanga chuan tun hmaa hel pawl kaihruai thintuin high court building ropui tak hawnnaa thusawina hun a hmang thei hian India ropuina leh a chhungah hnam chi tinte an lenzia a tilang fiah niin a sawi a. Tun hnaia Mizoram chhehvela harsatna thleng vanga Mizorama raltlan an luh nasat thu sawiin, “Mizoram chu remna leh muanna tluantling awmna ram anih avangin a chhehvela buaina leh harsat tawk kan unauten he remna leh muanna boruak hi pu darh a, an hnena thlentirtu ni turin min beisei mek a ni,” a ti bawk.
Gauhati High Court, Aizawl Bench building thar hawnna inkhawmah hian Union State Law & Justice Minister Arjun Ram Meghwal leh Gauhati High Court Chief Justice Justice Sandeep Mehta te bakah Justice Michael Zothankhuma, Judge, Gauhati High Court te pawhin thu an sawi a ni.
Gauhati High Court Aizawl Bench building thar hi NLCPR sum, Rs. nuai 4,624.12 senga sak a ni a. A satu hi North East Consultancy Services, Aizawl an ni a. March 7, 2017-ah sak hna thawh tan a ni a. A building pui ber (main building) hi Mizopa chhiara chhawng lia sang a ni.