Congress Legislature Party (CLP) leader Zodintluanga Ralte chuan MNF sorkar flagship programme SEDP leh chief minister-in a duan chhuah, Parking House Support Scheme (PAHOSS) chu a hlawhchham chiang hle niin a sawi a, NLUP erawh a fak thung.
CLP leader hian nimin khan thuchhuah siamin, inthlan dawna cheng nuai thum sem an tumna project, SEDP chu chiang takin a hlawhchham tih sawiin, “Tuna chief minister ni ta hian inthlan dawnah cheng nuai thum aia tlem lo an sem tur thu uar takin a tlangaupui a, mipuite pawh lo awih sakin sorkarna an chan phahna chhan pawimawh tak pakhat a ni,” a ti.
Sorkarna an chan hnuah inthlan dawna an tlangaupui lo ang hlirin SEDP an kalpui tih sawiin Zodintluanga Ralte chuan, “Mipui chan ve chin a tlem hle. Inthlan leh dawn tepah mi 60,000 hnenah cheng nuai thum ni loin, a let eng emaw zata tlem, Rs. 50,000 an sem ve tawk a ni,” a ti a, Congress sorkar chuan an intiam ang ngeia NLUP cheng nuai khat chhungkaw nuai chuang an pek thu a sawi.
CLP leader chuan SEDP chhungkaw 60,000 dang hnenah pek leh sorkarin a tum tih sawiin, “‘1st phase leh 2nd phase-a sem tur,’ an ti a, chu pawh cheng nuai thum a la ni chuang lo. Rs. 50,000 tho a ni. Hei hi an sem kher thei ang em hriat a ni lo a, an lo sem thei a ni pawhin 1st phase (Rs. 25,000) bak an sem hman dawn lo tih a chiang, an tum dan pawh a nih a rinawm. A chhan chu inthlan puan a hla tawh lo,” a ti.
Mi thenkhatin SEDP vangin MNF an la chhuahsan lo tih sawiin CLP leader chuan, “SEDP hi an sem leh hun hunah MNF chhhuahsan rûnpui a thleng dawn. Chhungkaw tam takin Rs. 25,000 dawn ngei an duh a, MNF an nih loh chuan dawn theih a nih loh avangin a hmingin an MNF ve mai mai,” a ti a, cheng nuai thum tiama Rs. 50,000/25,000 chauh petu MNF hi SEDP dawngtute pawhin vote an tum tawh loh thu a sawi.
CLP leader tar lan danin, NLUP avangin mi tam takin eizawnna ngelnghet an neih phah a, chhungkaw tam takin an dinchhuahpui a. SEDP erawh dinchhuahpui tam leh eizawnna bultanna tham a nih miau loh avangin hlawhtlinpui an awm loa, a dawngtute an demawm loh.
PAHOSS chungchang sawiin Zodintluanga Ralte hian, “Mi tam takin PAHOSS dawng tura thlan an nih avangin an in leh lote an tidanglam a, an dawn zui mumal leh theih si loh avangin an buai phah hle. |henkhat chuan PAHOSS dawng tura thlan an nih avangin sum puk chawptein an in leh lo an tidanglam a, an dawng mumal leh thei si lo a, leiba neiin an awm phah. PAHOSS hi a hlawhchham chiang hle,” a ti.
CLP leader tar lan danin PAHOSS dawng tura thlan zingah mi 11 chiah an sum dawn tur ang dawng kim an la awm. Sum dawng miah lo pawh a dawng tura thlan zahve aia tam an awm a ni.
PAHOSS nodal department UDPA chuan PAHOSS dilna 1,456 an dawng tawh a, tanpuina dawng turin mi 403 thlan a ni tawh a. Mi 140 hnenah first instalment cheng nuai 890 pek a ni a, mi 47 hnenah second instalment cheng nuai 200.60 pek tawh niin, mi 11 hnenah final instalment cheng nuai 34.20 pek tawh a ni. |anpuina dawng tura thlan zingah sum la dawng lo hrim hrim mi 205 an awm.