Ram hmasawnna leh dinkhawchhuahna hi kan sawi tam hle a. Mizoram mipuite hian dinkhawchhuah ve a, mi ram dinhmun anga awm ve hi kan chak takzet a. Mipui pawh hian phu ve in kan inhria a. Mahse, hmasawnna lam hawia kan hotuten ke min pen puina chu kan beisei ang ani si lo. Mipui hi kawngpengthuamah kan ding a. Hawi lam tur hre lovin kan tei mai mai a. Kan tei rei tawh khawp mai. Hei hi engvanga lo thleng nge ni ta ang le. Kan beisei angin kan hotute an awm lova. Thusawi thiamah min tluk luhpui a. A tak ramah min luhpui lova. Rinawmna ramah min hruai thleng lova. Beidawnna kawtchhuahah min din tir vang a ni.
Ramin hma a sawn theih lohna hi chhan leh vang tam tak a awm thin. Buaina vangte, zirna avangte, sakhuana avangte leh thil dang tam tak a awm thei. Mahse, tuna kan dinhmunah hi chuan ram a buai lova, sakhuanaah kan buai lova, mipuiin thu kan awi em em a. Khawi laiah tak nge kan hmasawnna daltu tiin kan inzawt kual ani ber mai.
Hei hi a chhanna ni bera lang chu hruaitu rinawm leh rinawm lohah a innghat a ni. Kar kalta khan kan rama kan mithiam zinga mi Pu Lalnunmawia chuaungo, IAS rtd, kan state chief secretary hial lo ni tawh chuan congress party a zawm chhan sawiin hruaitu rintlak an neih vanga zawm niin a insawi a. He a thusawi hi ngaihtuah chian tham a awm a. Tun dinhmunah chuan kan ram politics ah congress party dinhmun a tha em em lova. Sawrkarna siam tur ber party a hriat loh kan tih mek lai hian a siam awma beisei ber pawh an ni chuangin a lang lo. Mahse, kan ram kalphung leh kan hruaitu hrang hrangte hrechiang tak thin Pu Lalnunmawia thusawi hian beiseina a siam lian hle mai a. Beidawnna atanga beiseina neih theihna awmchhun hruaitu a hmu niin a lang. Singapore ram chhe ve em em atanga ram awhawma rawn dinchhuaktu an prime minister Lee Kuan Yew leh kan rama congress preaident Lalsawta chu rawn tehkhinin ram siamtha turin beiseina sang tak nen a tawiawm dawn ani a rawn ti a. Kan hriat theuh tawh angin Pu Lalsawta hi mithiam niin a hun kal tawhah minister te hial lo ni tawh a ni a. Mahse, hotu ber nih loh chuan ram siamthatnaah hian a duh angin ke a pen hleithei thin lo tih chu tunhnaia a thusawiah a lang chiang hle a. Minister anih laia sawrkar hnathawka awm a, engkim hmu ve phaka awm Pu Lalnunmawia’n heti tak mai ram siamthatna kawnga zui tlak nia a rawn hmu hi beiseina tisangtu awmchhun niin a lang. Lalsawta hian congress party hi a hmu chiang a. He party hmang ngei hian kan ram hi dingchhuak thei niin a hmu a ni.
Kan hruaitu dangte hi an chhe em em e tihna lam nilovin, politics lama rinawmnaa kan hmuhchian sa vek an ni a. Dinhmun azira thusawi dan thlak mai thin hruaituten min kaihhruaina kan hmu vek tawh a. Mahni thil tih leh duhdana ding nghet tlat thin, mipuite kaihhruaina kawngah pawh nggaihdan nghet tak neia kal thin zinga mi chu Pu Lalsawta hi a ni hmel khawp mai a. Singapore ram rawn tuaithar a, ram buai leh beidawnthlak lak atanga vawiin nia ram awhawma siamtu Lee Kuan Yew nen pawh an khaikhin theih viau awm e. Amah Pu Lalnunmawia pawh sawrkar hnathawk chhuanawm anih lai atanga mipui ngaihzawn a lo ni bawk a, han indawm tawn se kan ram harsatna atang hian min hruaichhuak thei tur bian i beisei chhin teh ang u. Beiseina kawngbo a min hruai thintute ai chuan enchhin ve pawh an chakawm khawp e.