Islamic State firfiak pawl chuan Afghanistan khawchhak lama TV station-a thawk hmeichhe pathum an kah hlum thu an puang.
Heng hmeichhiate hi Jalalabad khawpuia hmun hnihah thah an ni a, pakhatin hliam na tak a tuar bawk.
Thawhlehnia inkahna thleng hi tun hnaia he rama mi tum bik neia inthahna thleng tharlâm ber niin mihring dikna chanvo humhalhnaa thawk, judge leh chanchinbumiten beih an tawk zing ta hle.
Hmeichhe thahnaah hian Taliban an inrawlh rin a nih laiin IS chuan an tihah an chhal.
Jalalabad-a thah takte hi kum 18 leh 20 inkar, high school chhuak hlim an ni a. Mi mal ta, Enikas TV station-a dubbing department-a thawk an ni tih an thawhona hotu, Zalmai Latifi chuan a sawi.
Mursal Wahidi-i chu a hna haw lam thah a ni a. Mi dang pahnih, Sadia Sadat leh Shahnaz te pawh an haw lam tho thah an ni.
“Kea an hna atanga an haw kawngah beih an ni a, an vaiin kah hlum an ni,” tiin Latifi chuan AFP news agency hnenah a sawi.
Nimin khan IS chuan thuchhuah siamin an fighter-ten hmeichhiate hi an thah thu an tar lang a, a dang erawh an sawi lo.
Thuneitute chuan a bultumtu ber nia an hriat mi pakhat an man tawh a, mi dang an zawng mek.
An mi man hi Taliban niin an sawi a; mahse, an pawl chuan an pha.
February, 2020-a Taliban nena inremna an siam hnuah United States sipaiten Afghanistan hi an chhuahsan mek a, tharum thawhna a thlen zui zel hlauhna a lian hle.
Enikas TV station chuan hmeichhia 10 thawk zinga pali chu thah an ni tawh tih an sawi a. Heng zingah hian December-a Jalalabad-a kah hlum tak, presenter Malalai Maiwand pawh a tel tih an sawi a, hei pawh hi IS-in an tiah an chhal.