Aizawl : Aizawl North II bialtu MLA Dr Vanlalthlana’n Ramhlun Vengthar Sporting Club ten Futsal Local Tournament, Ramthar North Futsal Ground-a Inrinnia an buatsaih chu kick-off a hman pui.
Dr Vanlalthlana chuan veng chhung thalai ten an tuipui tak mai leh an phurna em em hetianga Ramhlun Vengthar Sporting Club ten an buatsaih chu lawmawm a tih thu a sawi a. Sport hmasawnna kawngah pawh rahbi pawimawh tak a nih ngei a beisei thu a sawiin, ruihhlo-in thalai tam tak a suat mekna karah leh chhungkua a tihbuai mekna karah hian thalai infiammi kal khawm te chu ruihhlo hi hnam hmelma a ni tih hria a, tlansan ngam zel turin a chah bawk.
Ramhlun Vengthar Sporting Club tan hian Dr Vanlalthlana hian a MLA fund atangin sports lama hma an sawn zel theih nan sum fai thahnem tak a lo pe tawh a, he kick-off hun an hmanna-ah a tul anga hman turin sum fai a hlan bawk.