Aizawl: North East India General PYD Environment Protection Committee-in Inrinni tuk khan Environmental Rally leh bawlhhlawh chhar fai hnatlang neih a ni a. Forest Minister TJ Lalnuntluanga’n a hmanpui.
Rally leh bawlhhlawh chhar fai hnatlangte hi team hnihin, Sikulpuikawn atanga Vana Pa Hall leh Millenium Centre atanga Vana Pa Hall inkara bawlhhlawh awmte an thian a. Vana Pa Hall kawtah an intawkkhawm a ni.
Intawhkhawmna hunah minister chuan PYD-ten Environment Protection Committee hial dina environment veina an nei chu lawmawm a tih thu sawiin, an hmalaknain ram tan rah tha a chhuah a beisei thu a sawi.
North East India huap hian Environment Protection Committee hi kum 2009 atang khan din niin, hmalakna tha tak tak an nei tawh thin a ni. Tun tumah hian Aizawl khawpui chhung pastor bial 16 atangin member 500 vel an thawk chhuak.