US Open hmeichhe singles a seeded number five changtu Ons Jabeur chuan hnehna chang turin a beih nasat leh viau a ngai a. Darkar thum dawn inkhelah Marie Bouzkova a hneh hram.
Nikum US Open final khel Jabeur hi kuminah pawh final lut leh tura rin hlawh zingah a tel a, nimahsela round of 16 a luhna tur kawngah hnehna chang tura a beih viau fo a ngai.
Kum 29 mi hian second round-ah a dam lohna avangin a taksa a la chak that tawk loh thu a lo sawi tawh a. Third round-ah hian 5-7 7-6 (7-5) 6-3 in Marie Bouzkova a hneh.
Arthur Ashe Stadium a inkhelah hian a khingpui seeded number 31 nihna changtu Bouzkova hian a mal ah hliam a nei a, hei vang hian a tang tluan thei lo.
“Hnehna sual chhuak thei mi ka nihna ka lantir chhunzawm theih zel ka inbeisei. Ka taksa ka ring tawk a, inkhel hautak hmachhawn hi nuam ka ti thin. Set thum zel khel pawhin final ka lut thei tih hi ka inhrechiang.” tiin Jabeur chuan a sawi.
A Grand Slam title hmasa ber lak tum a la bei mek Jabeur hian round of 16-ah hian Chinese mi seeded number 23 Zheng Qinwen a hmachhawn leh dawn a ni.