Aizawl: ZPM leader Lalduhoma chuan Zoram thupui leh titi pui ber chu ZPM a nih thu a sawi.
Inrinnia ZPM Southern Headquarters, Lunglei buatsaiha Thiltlang leh Pangzawla vantlang inkhawm leh mi thar lawm luh hun an hmanah thu sawiin Lalduhoma chuan, tunah Zoram thupui leh titi pui ber chu ZPM a ni a, tunkar chhung ringawtah pawh lawm luh an tam hle tih a sawi a. ZPM chu thawhrim rah seng tur an nih avangin an thatchhe ve tur a ni lo va, party dangte aiin taima tur an nih thu a sawi.
Eizawnna kawngah ZPM chu a duhtui dawn tih sawiin Lalduhoma chuan, ran vulh, thlai chin, etc., chungchangah sorkarin hma a lak zel dawn thu sawiin, “Mi taima leh ti tak tak peihte chu sorkarin a ngaihthah dawn lo a. Sorkar kalta te khan thlai chi hrang hrang min chin tir ve bawk thin mah se, kan din chhuah pui ngai lo. ZPM sorkar tharah chuan a rate hresa vek chungin thlai kan inchintir dawn a ni,” a ti.
Kumin MLA inthlanpui atana ZPM tana Lunglei North bial viltu V. Malsawmtluanga pawhin thu a sawi bawk.