Aizawl: Thingsulthliah khuaa Joint Action Committee for School Upgradation leh Thingsulthliah Higher Secondary School Student Union hmalaknain nimin khan Thingsulthliah, Thingsul-Tlangnuam leh Seling-ah te adhoc grant-in-aid phutna leh sorkar thu ngaihchan nan in tinah flag dum tar a ni.
Flag tar hmaa JAC Vice Chairman C. Lalruatkima kaihhruai inkhawmah Thingsulthliah HSS Principal & Managing Board Secretary R. Lalfakawma’n thu a sawi a. Thusawi zawh hian adhoc ngiatin an au rual a, khaw chhung in tinah flag tar chhunzawm a ni.
Nimin vek khan Joint Action Committee hruaitute minister a theih ang ang hmu turin Aizawl an kal bawk.
Inkhawma thusawitu, R Lalfakawma chuan school enkawlna tura ni 100 inhlawhna atanga mipui chan ai sawh hek ngai ziah mai te, VC-ten development work an khawih apianga school enkawl a tul vanga duhthala hnathawhna an nei lo reng maite chu a luhai thlak rei zozai tawh tih a sawi. Kum 20 zet private-a a kal chhung hian thawktute hlawhah ngawt pawh Rs vbc 2 vel zet a liam tawh thu te a sawi.
R Lalfakawma chuan tuna MNF sorkar hian mipui phurrit hi kum 2018 MLA inthlan dawn khan an hmuh thiampui a, ‘kan tlin phawt chuan adhoc-grant-in-aid-ah kan hlang ang’ tiin an khaw Community Hall-ah ngei an tiam a; mahse, vawiin thlengin a la hlawhtling lo a. Tun sorkar term tawp dawna education minister-in school upgradation kalpui tur ruahmanna a siamah pawh an tel lo zel a, tun dinhmuna a lan dan chu ‘Adhoc-ah kan hlang ang’ an tih chu hlan an tum ta lo nia a lan thu a sawiin, “Sorkar sum harsatna an sawi kan hre thin; mahse, keini thingtlang mipuite hi sorkar aiin kan harsa zawk a, puk tur pawh kan hre ve lo. Chuvangin, kan sorkar hotute hian min tiam tawh ang khan adhoc grant-in-aid ah min hlang mai rawh se,” a ti.
Adhoc grant-in-aid ngiat hian Thingsulthliah khuaa All NGO & All Political party meeting chuan thuchhuah joint resolution an lo siam tawh a; zirlai nu leh pa kal khawmte pawhin admission fee & monthly fee an awl theih nan adhoc ngiatna thuchhuah an lo siam tawh bawk.
Kum 2004-a din Thingsulthliah Higher Secondary School-ah hian tun dinhmunah zirlai 155 an awm mek a, subject paruk zirna hawn niin naupang an tam avangin loh theih loh avangin subject pangah zirtirtu double a ni a, naupangte pawh section-a then an ni.
Zirtirtu 11 leh office assistant pakhat awmin, kum 2019 atang khan NIELIT Study Centre hawngin computer zirna pawh kalpui a ni.