Ferrari in an ramah theihtawp chhuahin um mahse Red Bull Racing an chungnung a, an driver Max Verstappen chuan pakhatna luahin a zawnin intlansiak vawi 10-ah a chak.

Pathianni zanah khawvela motorsport a tlankawng ropui leh ngaihhlut hlawh Autodromo Nazionale di Monza-ah Dutch driver hian F1 chanchin a chak zawn rei ber record a siam a. A team Red Bull Racing hian a zawna vawi 15 pakhatna an hauhna ni bawkin an record thar siamlai chu an chhunzawm.

Vawi hnih world champion ni lai Verstappen hian point 145 in hma a hruai mek a. Champion intlansiaknaah um phak a har tawh dawn.

Ferrari tan hun tha

Formula 1 chanchin a team ropui ber chu Italian team Scuderia Ferrari an ni. F1 leh Italy leh Ferrari inkungkaihna boruak hi a danglam bik. Tun tumah pawh Ferrari tantu ‘Tifosi’ ten beisei an nei sang.

Ferrari hian kumina an car in tlankawng thenkhat a mil dawn lova, nikuma an car tlanchak zawng a pha dawn lo tih an hria. Hei vang hian an ram intlansiakah a tha thei ang ber an nihna turin an insawrbing.

Monza-ah ‘high downforce setup’ hmangin an car a chak. Kumin chhungin ‘upgragde’ hman tur la nei mahse hetiang em em a chakin an inlan leh theih a beiseiawm chiah lo.

Red Bull car aiin kawng ngilah darkar khat a kilometer 5 velin an top speed a sang zawk a. Kual thenkhatah chiah Red Bull hi an tluk lo.

Qualifying-ah hei hi lang nghalin Carlos Sainz chu pakhatna a ni a, Charles Leclerc chu pathumna niin Verstappen an inkarah a awm.

Intlansiakah pawh Sainz-a’n lap 14 chhung hma a hruai nghal. Nimahsela Red Bull car in tyre a ei nat loh zawk bakah lap khat chauh ni lovah ‘race pace’ a neih that zawk avangin Italian team an tang tluan thei lo.

Verstappen chuan, “Season tirah hetiang record ka siam ang tih hi ka beisei ngai lo. Chuvangin ka lawm a, ka record hi ka chhuang. Kan intlansiak dan khan fak a phu hle in ka hria.” a ti.