Aizawl: ZPM chuan nimin khan an party pisa-ah chhung inkhawm hun an hmang a. Thusawitu an treasurer, C Laltanpuia chuan kalphung thar mipui sorkar an din hunah kut hnathawktute tan kawl a êng dawn tih a sawi.
C Laltanpuia chuan party an din chhan chu policy a ni a, kut hnathawktute tana ZPM policy chu a ropui tak zet a. ZPM policy-ah chuan agriculture leh horticulture an nawr na dawn a, hemiin a ken tel tha tak mai chu kut hnathawktute tana thil tha tak mai lei tha siamna an buaipui a ngai tih sawiin, “Lei tha siamna khawl tha ber leh rang ber chu bawng vulh a ni a, lei tha hi ram changkangte chuan an ngaihluin pawisa tlukah an ngai a, thlai ilo engkim mai hlawk zawka kan thar theihna tura bul pawimawh ber a ni,” a ti.
ZPM au hla kalphung thar mipui sorkar chu amah leh amah a insawifiah nghal tih sawiin C Laltanpuia chuan, “Sorkarna kan siam hunah chuan mipuite duhdan a lal dawn a, mipuite kaihruaitu tha tak tak kan neih dawn avangin a thlamuan thlak hle a ni. Kut hnathawktute tan kawl a eng dawn a, awlsam si hlawk zawk bawk si a hmalakna kan kalpui theih nan kan mi thiamten ruahmanna an siam fel vek tawh a ni,” a ti bawk.