Arsenal in huntawp dawna hun pekbelh chhungin goal hnih an khung a, Manchester United 3-1 in an hneh.
Pathianni zanah Emirates Stadium-ah Arsenal in United an mikhual a. Inkhel hun pangngaiah team pahnihte inthlauhna a tam lo. Mahse inkhel tawp lam a hmuhnawm hle.
United in chakna goal ni thei tur an thun nia an ngaih tawh hnuah pawm a ni lova, an lamah Arsenal in an nawrna an veng zo lo zui a. Point khat tal hmuh tuma ‘risk’ an lak laiin Arsenal in an chhu let a, an chak ta a ni.
Arsenal an tlo zawk
Season hmasa khan an teuh a, kuminah hlawhtlin ngei an tum tawh. Arsenal in bul an tan tha a, inkhel tan tir lamah team hlauhawm zawk an ni.
Mahse United in counter-attack ah an hlauhawmna lantirin minute 27-naah Christian Eriksen-a pass tha tak chu Marcus Rashford-a’n goal-ah a khung.
Chance tha hloh nual tawh Gunners in an chhanglet nghal. Captain Martin Odegaard chuan minute khat pawh tling lovah an si phurh a sut.
He inkhelah hian VAR a langsar leh. Kai Havertz-a’n penalty a hlawhchhuak nia ngaih chu sut a ni a, United substitute Alejandro Garnacho goal khung chu offside chiah nia ngai bawkin pawm a ni lo.
A tawpah erawh team tha zawkin hnehna an chang. Declan Rice-a’n corner-ah vengtu nei lova awmin duhtawka petna hun a nei a, chakna goal a khung. United in sut an tum laiin Gabriel Jesus chuan counter-attack rang atangin an goal thumna a khung.
Arsenal boss Mikel Arteta chuan, “A tawp boruak kha he infiamna a kan tel chhan hi a ni. He team hi ka chhuang tak zet.”
“VAR thutlukna te kha chu thlirdan hrang hrang a awm thei ang, mahse kan inkhel thlir khan chak kan phu tih ka hria.” tiin an inkhel a thlirlet.
Inkhel hmasa lamah Liverpool in Anfield-ah Aston Villa an mikhual a, 3-0 in an hneh.
Liverpool tan minute thumna lekah midfielder thar Dominik Szoboszlai chuan goal a khung nghal.
Saudi Pro League lam nena sawizawm Egypt international Mohamed Salah chuan second half-ah an goal thumna a khung a. Minute 22-naah Darwin Nunez chuan goal ban pet perin a per hi Matty Cash chuan an lamah a ti lut bawk.
Liverpool manager Jurgen Klopp chuan, “Goal khung hma lo ila inkhel kal dan a dang mahna mahse vawinah kan inkhel thlirin kan kheltha hle. Aston Villa hi hmachhawn an harsa a, mahse tun tumah kan kheltha tak zet a ni.” a ti.