Aizawl: MNF Adviser Lalrintluanga Sailo chuan party thenkhatin an neih ve loh MNF chuan an president, Chief Minister Zoramthanga kaihhruaina hnuaiah party inrelbawlna fel fai tak an nei tih a sawi.
Nimina Mizo Hnam Run chhung inkhawmah Lalrintluanga Sailo chuan party thenkhat chu constitution an nei lo emaw tih mai turin vice president-ah te an inruat tawp tawp zel hian an party chhungah inrelbawlna a fel fai lohzia a hriat hle tih a sawi a. ZPM party pawh vice president an ngah tawh lutuk hian an party chhungah buaina a titam hle niin a sawi.
Deputy chief whip ni bawk, Lalrintluanga Sailo chuan Congress President Lalsawta chu MNF-a a awm lai pawha a zawi ngiai ngiai an tih thin kha a ni a, a kaihhruaina hnuaiah Congress an sorkar ngai a rin loh thu a sawi a. Chutiang bawkin ZPM pawh an awm tawhna party atanga nihna beisei, an pek si loh lungawi lo atanga mi beidawng awmkhawm an nih hlawm thu sawiin, an sorkar a rin loh thu a sawi a, “Keini erawh Chief Minister pu Zoramthanga kaihhruainain inrelbawlna fel tak kan nei a, chumi chuan min khalh ngil zel a ni,” a ti.
MNF sorkar hnuah ram pumah hri leng, khawchhak lamah lirnghing leh tum danga la tawn ngai loh leh la hriat ngai loh ramri buai avanga inkah ngai hial thlengte avangin harsatna nasa tak a tawk a. Heng harsatna nasat tak karah ramin hruaitu tha leh rintlak, Chief Minister Zoramthanga a nei a. Pathian kaihhruaina changin mipuite ei leh bar, nitin mamawh thilah harsatna lian lutuk tawh lovin tun hun a thleng tih sawiin, “Min beitute hian eng thil pawh ti ila min bei zel dawn; mahse, mipui tan kan beihna kawngah kan tang mar zel dawn a. MNF MLA 28-te hian mahni inhaivur turin hma kan la hman lo, ram tan kan pen miah miah mai a zawk a ni,” Lalrintluanga Sailo hian a ti bawk.