Khawvel eng i hmuh phat atangin i nu khan i nunah pawimawhna leh tangkaina a nei nghal chat a. I lo seilian a, pasal nei rual i ni chhova, a tawpah chhungkua i han din meuh chuan nu te hian awmdan thiam har an ti nghal hle.

An fanu te an thlahliam mai tur chu a hreh hian an hreh ngawih ngawih a, lawmpui hle chung siin, kum 20 chuang zet a lo chenpui tawh a fanu hi mittui nen a thlah lo thei lo a ni.

Chumi ina a nghawng chhuah taka chu- engemaw deuh hlek a, nangmah leh i pasal chanchin rawn ngaihven ser ser thinna te, eizawnna leh chhungkaw chungchanga thu leh hla hriattumna te bakah, in nupa nun leh naupai dan-na te thlengin a sawi pui dawn che a, inrawlh nih hreh hle mahse, nangmah maia kalsan che chu a remti tlat si lo.

Heng thilte hi a châng chuan ninawm takah te pawh a kal thei a, nun thar nena bul i tannaah phei chuan thil buaithlak ve tak chu a tling ngei ang a, i thinrim hial ang.

Heng a hnuaia tarlan turte hmang hian thil awm-dan a hriatthiam theihnan leh in mimal nun a zahthiam theihnan hmâ la rawh le.

Inhawng taka sawipui

A bulah thu la, thil awmdan (thlen dan) sawi pui thin ang che. A tanpuina leh thurawn te avanga i lawmzia te sawi pui la, chutih rualin, tun dinhmun tharah hi chuan nangmah ngeiin bul tan tharna neih i tum dan te hrilh bawk ang che.

Hetah hi chuan sawi pui chiam ngai lovin, a kuang lo a nawr em ni aw? tih ngaihdan a nei nghal mai dawn a ni. Bul tan nghal rawh le.

Lawmthu hrilh fo rawh

A châng chângin a ni lova, engtiklai paw’n ni thei se duhthusam a ni. A ngaihtuah thin che a, i tel lo chuan a khua a har thin a ni tih i hriat thu te hrilh la. Tunah chuan nangmah ngaihsaktu leh duat em emtu an awm thute pawh hrilh ang che.

I nu kha awm ta lo se, engtinnge i awm ang tihte ngaihtuah bawk la, dawh-theihna a tam thei ang ber neih tum ang che.

Ramri kham chin neih

Inrawlhna leh kuang lo nawrna ang chi thununnaah hian ramri kham chin fel fai tak siam a, a bak zawhna lak loh hi a ni. In nupa nunah khan engchin kha nge i nu sawipui i duh a, a zawhna te pawh i chhan ang? Mipat hmeichhiat-na leh fate chungchang lo richhuak ta se, eng chin chiah hi nge sawipui tha-a i hriat?

Chiang takin ngaihtuah la, i ‘set’ fel tawh chuan thiam lo intihna engmah i nei tur a ni lo. A chhan chu, Nu te hian an fate inthiam lohna tur han siam leh tih dan vela hi an thiam (expert) em vang a ni.

Mahni inrintawkna atan

Engemaw harsatna leh buaina awm deuh hlek se, i nu pun nghal thawt thawt suh. Hei hian in nupa leh chhungkuaa a inrawlhna tur kawng a sial thui mai mai dawn a, a tawpah lu haina chin i nei leh tho thovang.

A theih dan danin, heng harsatna hi nangmah ngeiin chinfel tum la, tichuan mahni inrintawkna te pawh zawi zawi-in i nei zel dawn a ni.

A tirah thil ni thei lo angin a lang mai thei.
Amaherawhchu, nangmahah khan chiang la, he harsatna te hi i chin fel loh chuan nupa inkara buaina lian tak a thlen thei tih mithla chungin, i hmâa lo awm te huaisen leh rilru fim tak pu chungin ching fel zawk ang che.

A rila rah a fa i nih chhung chuan i thlavang hauhna leh i lamtang a nihna hi eng hun hun ah emaw chuan a langsar takin a lantir dawn a. tha te te-a lo dawnsawn a, thinrim hmel pu lova, sawi pui a, ti ti pui hi i tih tur a ni a.

Heng a chunga tarlan te pawh hi hetiang hunah chuan tangkai takin i hmang thei dawn bawk a ni.