Aizawl: BJP National Secretary Office Incharge Pawan Sharma chuan Mizoram state sorkar hmalaknaa hmasawnna hnathawh hmuh hlan a nghahlelh thu a sawi.
Thawhtannia BJP party pisa, Mipui Run-a inkhawm hmanpuitu, Sharma chuan kum nga kaltaa Mizoram a lo vil tawh hun lai leh tuna Mizoram hmelhmang hi a la danglam vak lo tih a sawi a. Hmasawnna hnathawh tam zawk pawh central sorkar hmalakna a ni tih a lang reng nia sawiin, “State sorkar hmalaknaah hmasawnna hnathawh hmuh hlan a nghahhlelhawm hle a ni,” a ti.
Mizoramin BJP hlauh an inzirtir chu Congress party propaganda lian ber a nih thu sawiin Sharma chuan, “Inthlan dawn apiangin nasa takin Kristian state-ah chuan video siam chawp leh lemchan video an vawrh darh thin a. Chung chu mi tam tak chuan kan lo awih mai thin a. Chumi a nih avang chuan BJP chu kan hlauh phah ta a, kan state erawh a hnufual ta zel a ni,” a ti bawk.
Sharma chuan Prime Minister Narendra Modi kaihhruai BJP sorkar kum kua chhungin Mizoram mipuiten harsatna an tawk lo a, Kristian an nih avangin central sorkarin a thlauhthlakna a awm lo tih sawi a. PM scheme hrang hrangte a nihna angin state-a sorkar lo ni tawhte hian an hmang em tih chu a zawhna zawk a nih thu a sawi a. Mizoram hian mi rethei thleng phak hmasawnna a phu a, state sorkar tha erawh neih a ngai tih a sawi bawk.