India-in thlaa a tumna (lander) leh a leilunga tei kual tur lirthei, rover a tirh chhuah chu thlaa ni a tlak dawn tan tak avangin an chawl hahdam tan tih space research agency Isro chuan a sawi.
Tunah chuan ‘sleep mode’-ah an dah a, ‘insia muttirin ni chakna an neih theihna a tawp rih a, a battery a inpaih chhuak rih dawn a ni’ tih a sawi.
Isro hian ‘September 22’ vela thlaa ni a lan leh hunah an harh leh theih ngei an beisei tih an sawi bawk.
Lander leh rover hian an battery charge nan leh hna an thawh theih nan ni êng an mamawh a ni.
Vikram lander hian Pragyaan tia a hming an phuah, rover hi a dulah paiin August 23 khan la daidar tlem tak, thla chhim tawpah an tum.
India hi khawvel ram zinga thla chhip tawpa tum theih hmasa ber a ni a. US, Soviet Union leh China zuiin thlaa inkap kai thei palina a ni ta bawk.
Indian space agency chuan lander leh rover chet vel dan leh thlalak a thawn chhuahte a tichhuak reng.
Thawhtanni tukah khan Isro hian Vikram chu ‘thlaah him takin a tum nawn!” tih a sawi.
Chandrayaan-3 mission-a lander hi ‘a khawl tinung reng tura tih a ni a, cm 40 chuang intikangin cm 30-40 velah a tum leh’ tih an sawi.
Hetianga hlawhtling taka an zuan chhintir hi nakin zelah pawh lei lama sample lo thawn lettu atan a hman theih dawn em tih an hriat nan a nih thu an sawi bawk.
Thlaa Chandrayaan-3 a tum hun hi ruahmanna fel tak nen thlaa chhun a nih lai a ni a, ni ên chhung hi leia chawlhkar li chuang hret a ni a. Isro chuan ni lander leh rover hian ni 14 chhung vel ni êng hmanga an battery charge-na hun leh hna thawh hun an nei tih an sawi a. An tih tur chin chu ruahman ang thlapin an ti ve ve niin an sawi.
Isro hian thlaa zan hi leia chawlhkar hnih vel a ni dawn a, lander leh rover hian hna an thawk dawn lo va; scientist-te chuan ni a lan leh huna an thawh leh theih an beisei hle a. China-in a kah chhuah, Chang’e4 lander leh Yutu2 rover pawh an chawlh hnuah ni a chhuahin vawi tam an tho leh thei.
Vikram leh Pragyaan hi ni a chhuah leh huna an thawh leh theih nan Isro hotute pawhin theihtawp chhuahin an battery an charge full vek a, scientific instrument an neihte off vekin ‘him takin an hung’ tih an sawi.
Isro chuan, “Battery charge full a ni a. Solar panel a kente chu ni a lan leh veleh êng dawng thei turin a inpeih a, a receiver chu a inring reng a. Tih tur dang hmachhawpte ti thei tura a nun leh ngei a beiseiawm!” tiin X-ah an tar lang.
“Eng pawh ni se, thlaa India palai hi a awm reng tawh dawn a ni,” an ti bawk.