Aizawl: Tunlaiin Tlabung khaw chhungah rannung seh natna – scrub typhus leh khawsikpui (typhoid) vei an thahnem hle a, he natna hian chhungkaw tin deuhthaw a tibuai.
Tlabung Village Council hotuten an sawi danin tun laiin an khaw chhungah scrub typhus leh typhoid-in a tlakbuak avanga damlo an tam hle a, he natna pahnih hian an khuaa chhungkaw tih deuhthaw a tibuai a, chhungkaw thenkhatah phei chuan he natna hi an chhungkuaa mi tam zawkin an vei a ni.
Tlabung VC President Lalzawmpuii Punte leh a thawhpuite chuan tun laia an khuaa scrub typhus leh typhoid vei an thahnem avanga Tlabunga damdawi ina thawktute indaih lohna thleng mek chungchang zir chiangin nimin khan damdawiin hi an tlawh a, tun dinhmuna thawktu awm dan leh damlo inentir zatte zawtin, damdawi in tichangtlung tura sorkarin tun hnaia hmalakna a neih leh neih loh an thlithlai bawk.
Lalzawmpuii Punte chuan anmahni lo dawngsawngtu thawktute hmaah thu sawiin, Tlabung khaw panna kawng pawh zawh hleih theih loh khawpa a chhiat mek avangin a tawpkhawkah lo chuan hmun dang pan ngai lo tura damdawi in tihchangtlun chu a tul takmeuha an ngaih thu an sawi a ni.