Taliban rorelna hnuaia an awm hnuah Afghan hmeichhiate chuan an dikna chanvo an chan ngei theih nan an nawr ve mek zel a. Pathianni pawh khan Kabul-ah pung khawmin Islamist kal firfiak takten nun dan pangngaia an nuntir theih an phutna an tilang.
Kawng zawha lei kâna presidential palace pan an tum chu Taliban-te hian mittui tlakna leh hmarcha dipin an phuh niin an insawi.
Taliban erawh chuan hmeichhe rual pung khawm hi thunun theih loh an nih thu an sawi niin Afghan chanchinbu, Tolo News chuan a tar lang ve thung.
Pathiannia thil thleng hi hmeichhiaten Taliban rorel dan hmang dodalna an lantirna thar ber niin Kabul leh Herat-ah an lo inhawr khawm tawh thin.
Hmeichhiate hian hna thawh ve theih leh sorkara tel ve an phut a. Taliban chuan an sorkar hnuaia inawp dan kalhmang tur chu an puang chiang thuai dawn niin an insawi.
Taliban hian hmeichhiate hi sorkarah an tel thei dawn tih an lo sawi tawh a, minister erawh an ni thei dawn lo.
Hmeichhe tam tak chuan Taliban rorel hun hmasa, kum 1996 leh 2001 inkara an tawrh ang kha a thlen leh mai an hlau va. Hmeichhiate hi pawnah chuan an hmai khuh vek tura tih an ni a, thil ho tete-ah nasa taka hrem an ni thin.
“Kum 25 kal taa Taliban an lo lan khan sikul ka kal min phalsak zui ta lo,” tiin chanchinbumi pakhat, Azita Nazimi chuan Tolo a hrilh.
“Kum nga ro an rel hnuah kum 25 chhung ka zir a, nasa takin ka thawk a. Kan hma lam hunah hetiang hi a thlen nawn kan phal tawh lo,” a ti.
Pun khawmnaa tel dang pakhat, Soraya chuan, “Silaimu bawm (magazine)-in min chhu a, hmeichhiate chu kan thisen a chhuak zawih zawih reng a ni,” tiin Reuters hnenah a sawi.