US Open champion lai Carlos Alcaraz chuan a kum zawna champion nih tumin ke a pen chhunzawm a, Matteo Arnaldi lakah straight set a hnehna changin quarter-final a lut.
Arthur Ashe Stadium-ah Alcaraz a inkhel a nghetin a tlo leh hle a. Vuak dik avangin point hmuh vawi 31 lai neiin darkar khat leh minute 59 chhungin a khingpui world number 61 ni lai hi 6-3 6-3 6-4 in a hneh.
Third round a British number two Dan Evans hnehtu kum 20 mi hian set khatnaah a khingpui service a break sak hnuah inkhel a thununna chu a thlah zui tawh lo.
Arnaldi hi a Grand Slam fourth round luh hmasa ber a ni a, nimahsela champion tura rinkai lakah a che hleithei lo.
Alcaraz hian US Open bikah a match hnuhnung 16 atangin vawi 15 a chakna a ni a, “Wimbledon-ah ka champion khan grass court a inkhelh chu nuam ka tih thar thu ka sawi a. Court chi hrang pathum a inkhelh hi nuam ka ti in a pathumah hian ka nal chho viau tawh a, mahse tunah tak chuan hard court hi nuam ka la tih ber chu a ni.” tiin a sawi.
Alcaraz hian seeded number 12 Alexander Zverev a hmachhawn leh dawn a. Ani hian tun tournament a inkhel rei berah seeded number six Jannik Sinner chu 6-4 3-6 6-2 4-6 6-4 in a hneh.
Kum 2020 a final khel Zverev hian nikum US Open inhliam avangin a khel thei lova. A chak hnuah hian, “Ka professional tennis khelh chhungin tun hun hi ka huntawn zinga nuam leh hlu berah a tel. Ka inhliam hnua ka lo kirleh theih avangin a hlu bik a ni.” tiin a sawi.