Aizawl : September 5 hi India president pahnihna leh Vice President hmasa ber, Dr S Radhakrishnan pian cham pualin ram pumah Zirtirtute Ni hman thin a nih angin, kuminah pawh he ni pual hian ram chhung hmun hrang hrangah ropui taka lawm a ni. Mizoram chief minister Zoramthanga pawhin Zirtirtute Ni-ah hian zirtirtu hna thawk mekte leh chawl tawh zawng zawngte zahna chibai a buk.
Chief minister hian a Instagram account kaltlangin nimin khan zirtirtute zahna chibai bukin, “Zirtirtute hi ram leh hnam rohlu, lehkha zir thiamna bakah mihring puitling chherchhuahna hna thawktu ropui tak an ni a, an pawimawhna leh hlutna te, an mawhphurhna sang tak hi ram mipuiten kan hriatsak reng a pawimawh,” a ti.
Khawvela mi ropui leh mithiamte hi zirtirtute kut chhuak a nih thu tar langin Zoramthanga chuan, “Zirtirtu hna chu hna zahawm chungchuang (noble profession) an lo ti hial thin. Zirtirtu hna chu hna zahawm chungchuang tak a lo nih zel theih nan zirtirtute pawhin mawhphurhna an nei a, zirlaite leh ram mipuite pawhin hna zahawm thawktute zah leh chawimawi hi kan tih tur a ni tih i hre thar leh ang u,” a ti bawk.
Chief minister hian kumina National Award to Teachers 2023 dawng tur, India rama zirtirtu tha thlan chhuah 50 zinga tel phak, Govt. Diakkawn High School, Kolasib-a zirtirtu thawk lai Lalthianghlima chu a lawmpui thu a tar lang a. He National Award hi India ram khawpui New Delhi-ah India President-in nimin khan Zirtirtute Ni-ah hian a hlan a ni.