Tamil Nadu-a Cuddalore-ah halpuah leh halmawi siamna hmun puakah mi 9 vel an thi a, mi dang 5-in hliam an tuar bawk.
Hliam tuarte hi damdawi inah lak an nih tawh thu police-ten an sawi tih Associated Press chuan a tar lang.
Police-te hian chhiatna a thlen chhan an chhui zui nghal mek a, factory building hi a chhe hneh hle niin an sawi bawk.
Factory hi an state khawpui, Chennai atanga km 190 vela hla, Cuddalore district-a Kattumannarkoil-a awm a ni.
India ramah hian halpuah leh halmawi siam hi sumdawnna lian leh thil siam chhuahna lian tak a ni thin a. Heng halmawite hi kût pawimawh leh inneihna zawng zawngah pawh hal thin a ni.
A sumdawnna a len avang hian dan phal lohva a siamna hmun din te, a him tawkna tur dan zam tling pha lova siam chhuahna kalpuite a tam phah a. Dan zawm famkim lova siam chhuah hian a man a tlawm phah theih avangin a neitute pawhin sorkar hriatpuina nei kher lova siam chhuah an ching hle thin.
Nikum September thla pawh khan New Delhi hmar lam km 460 vela hla, Punjab hmar lama Bataka khuaah pawh halpuah leh halmawi siamna hmunpui hi a puak a, mi 22 zetin an thih phah tawh.