Health Minister Dr R Lalthangliana chuan NITI Aayog-in India rama state-te hriselna dinhmun, Health Index ranking a tihchhuahah Mizoram chu state tê zingah a kum zawnin pakhatna a nih thu leh ram chhunga nausen kum khat hnuai lam thihna tlem berna state a nih thu a sawi.
Nimina Aizawl Press Club-ah a department chan hrang hrangte hmalakna sawifiahin health minister hian thu thar thehdarhtute a kawm a. Mizoram chu nausen kum khat hnuai lam thihna, Infant Mortality Rate (IMF)-ah kum 2017 khan nau piang 100 zela 15 thi anga chhut a nih laiin, report hnuhnung ber kum, 2020-ah chuan pathumah tla thlain India ramah Mizoram chu nausen kum khat hnuai lam thi tlem berna state a nih thu a sawi.
Dr R Lalthangliana chuan MNF an sorkar atangin Zoram Medical College (ZMC) chu tihchangtlung zel niin dam lo khum 140 bawr ni thin chu tunah hian khum 470 hman theihin a awm mek a. ICU khum 13 awm thin pawh 30-ah tihpun a ni a. Heng bakah PICU 10, NICU 25 leh ICCU pasarih, a vaiin khum 72 a awm thu a sawi.
Health minister chuan ZMC-ah MBBS course hawn chhunzawm phalna hmuh a nih angin June 16, 2023 khan National Medical Commission atangin kum khat atan recognition hmuh a nih bawk thu a sawi a. May 1, 2023 atangin ZMC-a MBBS batch hmasa ber (2018-2019)-ten internship tiin, nakkum April/May velah an zo dawn tih sawiin, “Heng zirlaite hian internship an tih zawh hnuah chuan Mizoramin doctor a indaih lohna eng emaw zat a phuhruk a beiseiawm hle,” a ti.
Japan International Cooperation Agency (JICA) nen tangkawpin Zemabawkah Mizoram State Super Specialty Cancer & research Centre (MSSSCRC) dinna turah thawhhona thuthlung ziah fel a ni tawh a, he project hi Rs vbc 700 senna tur a nih thu a sawi bawk.
Mizoram sorkar leh World Bank thawhdunna project, US dollar maktaduai 40 senna tur, ‘Mizoram Health System Strengthening Project’ a kalpui mek tih sawiin health minister chuan, “He project hi tihhlawhtlin a nih hunah chuan hriselna kawnga kan state hmelhmang thlak danglam dawrhtu tur a ni,” a ti.
Sorkar kum kal mekah Mizoram State Health Care Scheme (MSHCS) 2023-2024 policy hnuaiah chhungkaw inziak lut 26,569 an awm thu minister hian a sawi a. Tun dinhmunah damlo inenkawlna bill ba Rs 63,88,79,817 a awm mek thu a sawi a. MSHCS tihchangtlunna atan Mizoram sorkarin Asian Development Bank (ADB) atangin loan a lak tur pawh thui tak kalpui tawh niin, tun atanga hun reilo teah a hmawr bawk theih an beisei thu a sawi.
Higher & Technical Minister hnuaiah Dr R Lalthangliana hian ram chhunga zirna in tehnaah NAAC Accredidation hnuaiah Mizoram chu India ramah zaa 83 hmuin, India rama hmu sang ber a nih thu a sawi a. He department hnuaiah tun dinhmunah college/institution valid NAAC Accrediation nei 19 an awm mekin, heng college-te hian RUSA 2.0 Grant an dawng tih a sawi.
Commerce & Industries Minister Dr R Lalthangliana chuan Rs vbc 15 hmangin Land Customs Station Zokhawthar tihchangtlun hna thawh mek a nih thu a sawi a. Interated Check Post (ICP) Kawrpuichhuah fencing chu thawh zawh tawh niin, tunah hian ICP din tura hmalak mek a nih thu a sawi a. Bangladesh nena insumdawn tawnna hmun, Border Haats dinna atan Silsuri khua, Mamit district-ah chak taka hmalak mek a nih thu a sawi bawk.