A thuneihna hmang suala dan loa a duhsak zawng sub-contract a pek avanga thiam loh chantir, PWD-a Junior Engineer C Lalfakawma chu kum li lung in tang tur leh cheng nuai 2 chawi tura hrem a ni.
Aizawl District Court-a Special Judge (Prevention of Corruption Act) Dr HTC Lalrinchhana chuan nimin khan C Lalfakawma hremna hi a puang a, kum li chhung lung in tang a, cheng nuai 2 chawi tura a hrem bakah pawisa a chawi tur hi a pe thei lo a nih chuan thla ruk dang lungin a tan belh ang.
Tar lan tawh thin angin Mizorama sorkara PWD Deputy Secretary H. Thanga Zate chuan contractor hnena pawisa indil chungchangah C. Lalfakawma lakah hian Lok Ayukta-ah thubuai a thehlut a, C. Lalfakawma chu PWD Khawzawl Division-a JE hna a thawh laia Rabung atanga Aiduzawl kawng laih leh enkawl zui thawktu contractor leh sub contractor hnenah sum thahnem tak laah puh a ni a, sum lak chungchang puhnaah hian finfiahna hmuh a ni lo.
Hetihlai hian dan loa a mi duhsak zawng, a thlen in pa leh thianpa ni bawk, Vanhmingthanga sub-contract hna a lo siamsak avangin thiam loh chantirin, kum li chhung lung in tang turin hrem a ni ta a ni.