Vantlangin video chi hrang hrang an inhlanchhawn (share) theihna lian, YouTube hmangtu zinga khawvela upa ber pawl, India chhim lama pitar pakhat, kum 107 zeta upa, Mastanamma an tih chu a thi.
He pitar hi a ei siam a pho lan thin avanga internet khawvela hriat hlawh a ni a. A ei siamte hi tualchhunga an ei thin ang niin amahin khawvelin a hriatthiampui ve vak lem loh, a chher chawpte an ni.
YouTube-a a channel, Country Foods tih chu latu (subscriber) maktaduai chuang awm tawhin a ei siam chi hrang hrang za chuang dah a ni tawh a. Heng zinga en hlawh ber pakhat chu watermelon chicken a ni.
Mastanamma-i channel hi a tupa leh a thianpa enkawl sak niin kum 2016 khan an siamsak a, a hit ta zek a ni.
Andhra Pradesh-a piang, Mastanamma hian nikum khan kum 106-a upa a ni tawh nia a inhriat thu a sawi a, birth certificate a neih miau loh avangin ama sawi dan bak hi sawi zui ngaihna a awm lem lo.
A video tam berah hian thingtlang kilkhawr taka kawt laiah thuin ei rawngbawlna hmanraw changkang leh fai vir ver pawh hmang lovin awlsam tete-in a siam mai zel a. Thil han vel vel nan pawh India miten an tihthan ang takin, chemte-a mawi tak taka zai vel lovin a tinin a sik khawk hlawk hlawk mai zel a. A siam zawhah pawh India chhim lama an tih thin dan angin, balhla hnaha funin a eitu turte hnenah a sem mai thin a ni.
A tlawhtu leh a video entute chuan Mastanamma-i ei siam dan hi YouTube-a ei siamtu dangten an siam dan leh an siam chhuah an dah thin nen a danglam niin an sawi thin a. A chenna bul hnai maia sangha leh thil dang a mante pawh a chhum a, engtin emaw, mawi hnai leh itawm hmel zawka han pho lan vel a nei lem lo a ni.
“Indian tih dan thin ang taka engkim a ti hi star a nih chhan pawh a ni,” tiin an sawi a, intihchangkan leh inchawi lar chiam tumna awm lem lovin, a nih ang anga a lanna chu miten an ngainat phah nia ngaih a ni.
Country Foods chuan Thawhtanni khan Mastanamma-i thih thu hi an puang a, an vuina inkhawm thlalak an dah tel bawk a. Heta tang hian vantlang inbiakpawhna (social media) hmangin mi tam takin a ei siam tui an tih thu leh a thi an ui thu an sawi nghal chuah chuah a ni.
Mastanamma hian ei tur chi hrang hrang a siam zingah dawnfawh leh arsa a kan pawlh chu a larpui em em a. Hei bakah hian eggplant curry leh spicy catla fish curry te pawh miten an ei duh tak a ni bawk.