Zote Toyota Mizoram Premier League Season 10 round thumna Thawhlehni khan khelh a ni a. Inkhel pahnih atangin chak zawk an awm lo.
Armed Veng a 1st Bn. MAP Ground a inkhel hmasa zawkah hian chak mamawh FC Venghnuai leh Aizawl FC te an inkhel a, 1-1 in an inhnehtawk.
I-League club Aizawl FC hian round hmasa lamah point an hloh a, hei vang hian chak an mamawh. Chak turin bul tan that a pawimawh a, an tum ang takin an khel.
Minute 9-naah striker hriam Lalrinzuala chuan goal khungin Aizawl FC in hma an hruai nghal.
Mahse inkhel hmasa lam ang thovin an tlarhnung a phui lo. Minute 23-naah Venghnuai in Eric Remruatpuia Chhangte hmangin an si phurh an sut.
Inkhel hnuhnung zawkah kaithar club Project Veng FC in MPL a an point hmasa ber an hmu a, Mizoram Police nen 1-1 in an inhnehtawk.
Kolasib club hian minute 10-naah goal mawi bik Andy Lalrinpuia hmangin an khung a. An chakpui mai dawn nia a lan tawh hnuah minute 91-naah H. Lalbiakthanga hmangin Mizoram Police in an si phurh an sut.