Lunglei Municipal Council (LMC) hotuten nimin khan thu thar thehdarhtute kawmin Mizoram sorkar atangin an mamawh thawktu an dilnaa hlawhtlinna hmuh tur a la awm loh avangin a taka hnathawh a la harsat thu an sawi.
LMC Office Conference Hall, Lungleia an inkawmnaah, LMC hotute chuan LMC bultanpuitu leh thil chinchang hre ber CEO sawnsak an nih avang leh secretary chu revenue department enkawl teltir a nih bawk avangin harsatna an tawh phah thu an sawi a. Hetih lai hian, CEO thar erawh tun hnaiah sorkarin a pek thu an sawi a, FAO post an dilna pawh Dist Treasury Officer hna chelh mektu kawptir a nih thu an sawi.
LMC hotute sawi danin LMC din a nih atanga sum hmuh tawh zawng zawng chu Rs 1,56,57,126 a ni a. Councillor-te lawmman atan Rs 12,08,821 hman tawh niin, office expenditure-ah Rs 14,20,893 hman a ni tawh bawk.
Draft Lunglei Municipal Council Regulation/ by Laws paruk peih tawh niin, mipuite tan en theih tura hun hawn kal mek a ni a. September 13, 2023 khian Board of Councillor Meeting-ah pawm a, Cabinet pawmpui tura theh luh tum a ni.
LMC Complex tur chungchangah a hmun tur zawn mek a nih thu te, a sum lam chu UD&PA lamin ngaihtuah sak an tum thu te, Truck Terminal siam turin NHIDCL lam nen indawrna kalpui mek a nih dan leh Lunglei khawpui dai hmun thumah Solid Waste Management Centre siam tura hmun hrang hrang an en tawh dan te, Lunglei hmar lam Pukpui daiah chuan LMC Chairman-in a ram a pek thu te an sawi.
Lungleia lirthei parking fee khawn chungchangah LMC hotute chuan, tuna Lunglei parking khawn dan fel tawklo leh parking atanga sum lutte hman a nih danah Lunglei mipuiten an hrelo reng chu thil fello tak nia an hriat te, LMC-in parking fee khawn thei tura hmalakna a kalpui mek thu leh October thla atang chuan LMC kaltlangin Lunglei khawpui parking fee felfai zawk leh awmze nei zawka khawn theih an beisei thu te an sawi bawk.
LMC hnuaia Ward 11-ah June thla liamta khan Ward Committee din fel vek tawh a nih thu leh Ward Comtt member atan hian political party tin aiawh leh a dah awma ngaihte an dah thu te, Sanitation leh Advertisement and Hoarding te chu a enkawl mektu Deptt atangin LMC kutah dah a nih thuai tur thu leh kum thar atangin property tax pawh lak theih an beisei thu an sawi bawk.
Thuthar thehdarhtute an kawmnaah hi LMC Chairman Lalzuithanga’n a kaihruai a, Vice Chairman K. Lalrinawma leh Executive Councillor Zorinsanga ten an tawiawm a ni.