US Open hmeichhe singles inelna a seeded number three nihna hauhtu Jessica Pegula leh Wimbledon finalist Ons Jabeur ten fourth round an pel thei lova, an US Open zinkawng a tawp.
American mi Pegula hi kuminah tualchhung player zinga champion thei tura rin zingah a tel a. Nimahsela a hnampui Madison Keys lakah tihsual a nei ngun chu a tuar a, 6-1 6-3 in a tlawm.
Kum 29 mi Pegula hi WTA Tour-ah player tawnhriat nei tha niin hlawhtlinna nei hnem pawl nimahsela Grand Slam bikah quarter-final aia thui a la kal ngai lo.
Tun tournament tan hma in Canadian Open-ah a champion a, champion tura rinkai Iga Swiatek vaw thlatu a nih bawk avangin a thawm a ring hman hle.
Nimahsela a thian hnai tak Keys lakah an inkhelh tan atangin a khel tluang hleithei lova, set hmasa zawk hi minute 28 chhung lekin a hloh.
Nikum final khel Ons Jabeur pawhin 6-2 6-4 in Zheng Qinwen a hneh lo ve bawk a. Tun tournament-ah a fit that tawk loh avangin nidang a tluk pha lova. Harsatna nei chungin round of 16 thleng thei mahse a bak a kal thei tawh lo.
Amah hnehtu kum 20 mi Qinwen hian seeded number two Aryna Sabalenka chu a Grand Slam quarter-final khelh hmasak berah a hmachhawn dawn.
Kum 2021 leh 2022 a Flushing Meadows a semi-final lut Sabalenka hian Russian mi seeded number 13 Daria Kasatkina chu 6-1 6-3 in a hneh.
Kum 25 mi hi tun tournament zawh a world number one thar tur a ni a, round of 16 a tla Iga Swiatek a thlak ang.