Mizoram Pradesh Congress Committee (MPCC) chuan BJP sorkar hnuaiah India ram Hindu lal rama din tumna chak takin a kal mek a, sakhaw tê zawk leh hnam tenau zawkte chu dan hmanga rahbeh leh thliar bik an ni mek niin a sawi.
Nilaini khan Aizawl Press Club-ah thu thar thehdarhtute an kawmnaah MPCC thupuangtu, Dr Lallianchhunga chuan BJP kaihhruai sorkar hnuaiah dan hmanga Hindu lal ram din tumna kalpui mek a nih thu a sawi a. India ram tan dan pakhat (One Nation, One Law) chauh hman a nih theihna turin Uniform Civil Code (UCC) an buaipui mek a, June 17, 2023 khan BJP party mi leh sate intawhkhawmnaah UCC hman vat duhna an sawi chhuah hial tawh thu leh, ram leilung fate rahbeh tumin Forest (Conservation) Amendment Act, 2023 kalpui tumin hma an la mek bawk a. Tunah ‘One Nation, One Election’ kalpui tumin hma an la a, ‘One Nation, One Language’ pawh an manifesto-ah a tel tih a sawi.
BJP chuan engkim mai thlak danglam vek tumin hma an la tih sawiin Dr Lallianchhunga chuan, Indian Penal Code (IPC) chu Bharatiya Nyaya Sanhita tia thlak an tum thu te, Criminal Procedure Code (CrPC) chu Bharatiya Nagarik Suraksha Sanhita tia thlak an tum thu leh Indian Evidence Act pawh Bharatiya Sakshya Bill tia thlak tumin parliament-ah put luh a nih tawh thu sawiin, “Sawiselna nasa tak vangin Standing Committee of Parliament enfiah tura dah mek a ni,” a ti a. September 18, 2023-a Special Session of Parliament neih turah ‘India’ tih chu ‘Bharat’ tih chauh hman turin a thlak dawn nge tih pawh sawi chian theih a nih loh thu a sawi bawk.
Dr Lallianchhunga chuan UCC hi kalpui a nih lohna turin Mizoram Kohhran Hruaitute Committee (MKHC) leh Mizoram Presbyterian Kohhran chuan Law Commission of India hnenah dodalna ziakin an thlen a, Congress party pawhin ziaka an thlen thu a sawi a. August 25, 2023-a All India Congress Committee (AICC) hruaituten Central YMA hruaitute an kawm tumin, UCC leh Forest (Conservation) Amendment Act, 2023 chu hnam tlem zawk leh sakhaw dang tan a him loh avangin state leh central-ah Congress a sorkar chuan an thiat dawn a, an kalpui ve dawn lo, tia AICC hotuten an sawi chu Congress party dinna nghet tlat a nih thu a sawi.
BJP sorkar hmalakna hrang hrang hian Mizo hnam lungphum pawimawh tak a sawinghing mek nia sawiin, “Hnam tenaute leh sakhaw dang betute namnula Hindutva kalpui tum BJP hi India ram leh Mizoram tan pawh a tha lo a. A bik takin Kristian-te tan pawha him lo tam tak a awm avangin Mizoram mipuiten BJP leh a thawhpuite paihthlaa sakhaw zalenna duhtu Congress party hi Mizoram mipuiten thlawp turin kan ngen che u,” MPCC thupuangtu hian a ti.