AIZAWL: Trained Nurses’ Association of India (TNAI), Mizoram State Branch chuan nimin khan Synod Conference Centre, Mission Vengah general conference an hmang a, hmanpuitu, Chief Minister Zoramthanga’n damlo anmahni pantute hmangaihna nena enkawl turin nurse-te a chah.
Chief minister chuan nurse-te hnathawh chu ropui a tih thu leh ram mipuite hriselna kawnga tha thawhtu tangkai leh pawimawh tak an nih thu sawiin, nurse-te chu an mihringpuite rawngbawlsaktu an nih thu te, damlo anmahni pantute chu hmangaihna nena enkawl zel tur leh tha taka dawngsawng thin turin a chah.
Sorkarin health care system tihchangtlunnaa hma a lak dante tar langin nursing directorate siam thar a ni chu a lawmpui thu a sawi a. TNAI Mizoram State Branch-te an kalzelna turah duhsakna a hlan a ni.
TNAI Conference vawi 19-na ni khatnaah hian 2019 hnua Florence Nightingale Award dawngtu nurse palite bakah TNAI Hqrs. atanga tel official leh Mizoram Branch OB leh EC Member-te chawimawina thilpek an hlan a, an member thite sunin ro an rel bawk a. Vawiin hian inzirtirna hrang hrangte neih a ni ang a, hruaitu thar an thlang dawn a ni.
TNAI hi kum 1908-ah din niin Mizoram State Branch hi August, 1964-ah din a ni a, September 1, 2023 thleng khan Mizoramah TNAI Life Member 3,750 an awm a. District branch pasarih awm mekin TNAI Mizoram Office dinna tur ram Ainawn Vengah TNAI Hqrs-in a leisak bawk a ni.