Rajasthan-a Jhunjhunu district-a Khetri khuaa mi, putar kum 95-a upa chu Inrinnia a thi nia an sawi hnua nimina amah thlahna hun hman tuma an inbuatsaih laiin a tho leh tlat!
An sakhaw tih dan angin Budh Ram Gujjar-a tu leh fate zinga mipate chuan amah sun nan an lu pawh an ziat kawlh vek hman tawh a, vuina hun hmasa pawh an hmang zo tawh a; mahse, a taksa a rawn lum a, hriatna pangngai neiin a nung leh ta tlat si a ni.
Budh Ram hi Inrinni khan biak theih lohva a awm avangin chawhnu lamah a chhungten doctor an ko va, ani chuan a thi tiin a sawi a. A chhungte chuan puithiam kovin an tih dan pangngaiin an lu an ziat kawlh a, a fapa upa ber, Balu Ram chuan, “Kan sakhaw dana amah bual fai tura kan inbuatsaih leh mek laiin ka pa hi a lo tho leh ta a ni,” tiin an hlim hle tih a sawi bawk.