External Affairs Minister S.Jaishankar chuan Russian Foreign Sergey Lavrov chu nimin khan New Delhi-ah a kawm a. Ram pahnih inkungkaihna, sumdawn tawnna bakah kum tawpa President Vladimir Putin-an India a tlawh hun turte an sawi dun.
Ram pahnih hruaituten an inbiak zawha thuchhuah intawm an siamah inkalpawhna turte an sawi a, heng zingah hian International North-South Transport Corridor leh Chennai-Vladivostok Maritime Corridor pawh a tel tih tar lan a ni.
Lavrov-a hi ni hnih châmin India a lo tlawh mek.
Jaishankar chuan, “Sum leh pai lama inpawhna tha zawk awmna tura Russia khawchhak kila remchang awmte kan sawi a. Inkalpawhna lamah International North-South Transport Corridor leh Chennai-Vladivostok Maritime Corridor chungchang pawh kan sawi,” tiin thuthar lakhawmtute hnenah a sawi.
Foreign minister chuan an inkawmna hi kumin kum tawpa kum tin tih dana inbiakna nei tura President Putin-an Delhi a tlawh tur inbuatsaihna pakhat a nih thu a sawi.
“Kan inkungkaihna hi a tha a, hma lam pawh kan thlir zel a. Nuclear space leh ram venhimna lamah pawh huang zauh zel tumna lam pawh kan sawi a ni,” tiin external affairs minister chuan a sawi.