FIFA Women’s World Cup a Spain champion puitu coach Jorge Vilda chu tunhnaia Spanish hmeichhe football buaina inkaihhnawihah ban a ni.
Vilda hi Montse Tome chuan a thlak dawn a, hmeichhe team enkawl tur hmeichhia hmasa ber a ni dawn.
Spain in World Cup a hlawhtlinna an neih hi an football federation president Luis Rubiales-a’n forward Jenni Hermoso chu lawmman sem laia a fawh avangin boruak dangin a hliahkhuh nasa hle a. Hermoso hian a remtihna a ni lo tih a sawi avangin Rubiales hi bang tura tihna a lian hle.
He buaina avang hian Vilda coaching staff leh player 81 ten Spain tana inlan an tum lo tih an lo sawi tawh.
Rubiales hi a bang duh lova, nimahsela football thuneitu sang FIFA chuan a hrem lailawk rih.
RFEF hian Vilda an ban chhan hi sawi fiah lo mahse kar hmasa khan Rubiales thlawptu zinga ngaih kum 42 mi Vilda hi ban an tum nia sawi a awm tawh.
An coach thar kum 41 mi Tome hi Spain tana vawi li khel tawh niin Vilda coaching team a tel sa a ni.