Students’ Self-Support Union (SSU)-in zirlai ni chunga mahni zirna intum te hnena chawimawina a hlan thin ‘Self-Support Award’ chu Thawhlehni zan khan zirlai pathum hnenah a hlan leh a. Hemi puala Ignite Studio, Aizawla hun buatsaih chu Rajya Sabha MP K. Vanlalvena leh SSU thawhpui 3:16 Plan Solution CEO John Lalpeka ten an telpui.
Self-Support Awa- rd dawngtute – Lalcha- mzuali, Ngopa, Govt. J. Thankima College-a zirlai; Lalhmachhuani, Zuangtui, Aizawl, LD Colllege of Engineering, Ahmedabad-a zirlai leh Lalhmangaihsa- nga, Bairabi, Govt. Kolasib College-a zirlai te an ni a. Ahmedabad-a awm Lalhma- chhuani chu a zirlai laklawh avanga a lo haw theih loh avangin a aiawhin a ni-in a chawimawina dawn hi a lo dawnsak a ni.
He chawimawina hian Rs 20,000 a keng tel a. Chawimawina dawngtute hi midang tibuai lova kawng hrang hrang hmanga inhlawha an zirna tur intuma zir te niin, Lalchamzuali, Ngopa hian College a kal aţangin chhungte tibuai lovin a zirna tur a intum ţan a. A hunawl neih apiangah a ţul ţul thawkin mi In leh a vel tihfai te, nauawm leh insuk te, mi huan thlo fai te, College building leh Campus tifai tea inhlawh ţhinin, a zirna tur a intum bakah a nau te zirna tur pawh a tumsak fo bawk.
Lalhmachhuani, Zuangtui, Aizawl hian Class IX a zirlai aţanga chhungte tibuai lova a zirna intum duhna rilru a nei tan a. School kal pahin inhlawhna tur zawng kualin tuition pe te, nau awm leh mi In tifai te, la hlum tein a inhlawh thin. Online shopping hmangin a theih ang angin sum a tuak thin bawk. Civil Engineer a zir tura Ahmedabad a pan hnu ah pawh chawhmeh zuartein a la inhlawh zui zel a ni.
Tuntuma SSU chawimawina dawngtu zinga mipa awmchhun Lalhmangaihsanga, Bairabi pawh Class X a pass hnuah Kolasib-ah mahnia In luahin, a zirna senso leh a inluah man te chu Class XI a nih aţangin amahnin a intum thei tawh a. School chawlh leh exam zawh chawlh te chu inhlawh nan a hmang ber a. A rem rem thawkin mi In sa-a inhlawh te, cement leh brick unload te, Gas sem bakah chan- chinbu sem tein a inhlawh thin bawk.