All NGO Coordination Committee, Mizoram leh Manipur Zohnahthlak pawl hrang hrang hruaituten nimin khan Aizawlah Zohnahthlak hnam hrang hrangte inpumkhatna chungchangah inrawnkhawmna an nei.
He inkawmhona hi Central YMA Hall, Tuikhuahthlangah neih a ni a, NGO Coordination Committee chairman, Central YMA President R. Lalngheta’n a kaihruai a, pawl hrang hrang hruaituten inunauna tha tak a awm theih nan an ngaihdan leh duh dan te, an kal dan tur nia an hriatte an sawi ho a. Hei hian boruak tha tak hring chhuak ngei se an duh thu an sawi bakah ngun zawka la rel leh nise, an ti bawk a. Inkawmhonaah hian pawl hrang hrang aiawh mi 150 vel an tel a ni.
Zohnahthlak hnam hrang hrang pawl aiawh leh Zohnathlak MLA, mi 50 rual chuan nimin tuk khan Chief Minister Zoramthanga chu a pisaah an kawm bawk a, buaina an tawh meknaa Mizoram sorkar leh mipuiin an puihna chu lawmawm an tih thu te, tanpui an nih danah an lung a awi thu te CM hi an hrilh a ni.
Chief minister chuan Manipur-ah boruak tha lo a thlen avanga mipui tam takin harsatna an tawk chu pawi a tihpui thu a sawi a, an kal zel dan turah Zofa Inpui hrang hrangte leh pawl hrang hrangte chu inpumkhatna tha tak neia uluk leh fim taka ngaihtuahna seng chunga hma lak turin a fuih a, Mizoram sorkar leh Mizoram mipuite chu Zofate tan an dinna ngaiah an din reng thu leh puih an ngaihna apianga puih zel an inhuam thu a sawi bawk.