Indian space agency Isro chuan ni zir chiang tura thlalem an kah chhuah, a zinkawng zawh mekin thla a lak hmasa ber an tichhuak.
Aditya-L1 hi Inrinni khan kah chhuah niin km maktaduai 1.5 a zin dawn a, hei hi lei leh ni inkar hlat zawng 1% chauh a ni thung.
A tum ram thleng tur hian thla li a thang dawn niin Isro chuan a sawi.
India-in a vawi khat nana ni lam pana thlalem a kah chhuah hma lawk hian thla chhim tawp hnaiha thlalem tumtir hmasa ber ram a ni tawh bawk.
Ningani zingah khan Isro chuan thlalak pahnih, September 4-a Aditya-L1-a thlalakna an dahin a lakte a pho chhuak a ni.
Thlalak pakhat zawkah chuan thla leh lei a lang dun a. Lei chu a lang lian hle a, thla chu hla takah te reuh tein a lang ve a. Pakhat zawk erawh amah leh amah thla a inlak, ‘selfie’ niin science hmanrua pasarih a phurh zinga pahnih a lang tel.
India-in ni zir chiang tura a tirh hi a hmingah Surya tih an phuah a, hei hi Hindu ni pathian, Aditya tia an sawi bawk thin hming chawia phuah a ni.
L1 hi Lagrange point 1 tihna a ni ve thung a, he hmun hi ni leh thla inkara mi, thlalem kah chhuahin a pan mek hmun a ni.
European Space Agency chuan Lagrange point hi vanthengrenga thil lian tak pahnih, ni leh leiten hipna an neihte an intawhna, an hipna tha an inpaih tawnsakna lai chiah a ni a, thlalem pawh helaiah hian a dir/ding thei dawn niin an sawi.
Aditya-L1 hian ‘a inhunna tur hmun’ hi a thlen hunah chuan leiin ni a hel dan chak zawng ang chiahin ni a hel ve thei dawn a. Tuialhthei pawh a mamawh tlem sawt dawn tihna a ni.
Inrinnia kah chhuah a nih hnuah khan Aditya-L1 hian ruahman angin khawvel vawi hnih a hel chhuak tawh a. Vawi thum dang a hel leh hnuah L1 lam panin a kal zui dawn a ni.
A tum ram a thlen hunah hi chuan rem takin ni a thlir thei dawn a, uluk takin ni chungchang hi zirin lei lamah a hmuhte a thawn let dawn a ni.
Isro chuan tuna ni zir tura an senso hi an puang lem lo va; mahse, Indian chanchinbute chuan Rs. tluklehdingawn 3.78 niin an ziak.