Demarai Gray chuan Everton a chhuahsan a, Saudi Pro League club Al-Ettifaq a zawm.
Kum 27 mi Jamaica winger man hi puanzar ni lo mahse khawthlang lam chanchinbumite sawi danin a manah Pound maktaduai 8 vel Al-Ettifaq hian an seng a, kum li contract an ziahpui.
Gray hi tunhnaiah Everton manager Sean Dyche nen an inchhang zeuh zeuh a. Hei vang hian chhuak mai tura ngaih a ni tawh.
Tun nipui player bazar inhawn chhungin Fulham zawm turin an indawr a, nimahsela a insawnna tihfel a nih loh avangin social media kaltlangin a manager a sawisel ta chiam niin a lang.
Gray hian a insawnna puanzar a nih hnuah, “Thudik chu ka club tan hian khelmual chhung leh pawnah theihtawp ka chhuah thin tih hi a ni.”
“Tun nipuiah ka hmalam hun in sawi a hlawh nasa a, a tam thei ang ber inkhel turin ka inpeih a, mahse hei hi ka dinhmun nen ka thlirin a thleng thei dawn lo niin ka ngai.” a ti.
Hetihlai hian Dyche chuan Gray hian a hma a a lo sawisel tawhna chhangin club in a remtihna lovin tu insawnna mah a thleng ngai lo tih a sawi a. Gray hi a insawnna tihfel a nih tak loh hnuah training zawm a duh lova, he club a awm zui zel a duh lo tih a sawi bawk.
Hetihlai hian Gray hian a manager chungchang hi sawiin, “Mihring anga min zah lotu tana khelh zel chu thil harsa tak a ni.” a ti ve thung.
Gray hian kum 2021 khan Bayer Leverkusen atangin Everton hi a zawm a, an tan Premier League match 67 khel tawhin goal 9 a khung tawh.
Tun nipuiah Turkish club Besiktas nen pawh sawizawm a ni rei hman hle.