- Laiu Fachhai
Mizoram chuan kumin (2023) kum tawp lam, November thlaah inthlanpui kan hmachhawn leh dawn ta reng mai. Party ticket puan, ticket chang lote nuar, party member nihna leh hruaitu nihna atanga bang, lawmluh, lawmluh laia an thusawinaah an party hlui sawisel leh sawichhiat, an party thar sawi tha, manifesto ropui leh tha, thutiam hlen leh hlen lo, sawrkar leiba, Assam Rifle sawn chhuah, etc, etc ten social mediaah leh chanchinbuah te hmun a luah tam leh ta hle a, choka titi thlengin hmun a luah mek a ni. Chumi karah chuan zawlnei intite pawhin tling tur leh tling lo turte an in hrilhlawk siak sup sup a. Social media a tikhawhar lo a, a nawmna chin pawh a awm ve bawk e.
Mizoram hi population percentage atanga chhut chuan, party member leh hruaitu nihna atanga banna lehkha thehlut leh lawmluh tamna ber State kan ni maithei. Inthlanna zawlnei (election prophets) nei tam ber State pawh kan ni hial awm e. Rinnaa putlinga ngaih thenkhatte pawhin, zawlnei intite hrilhlawknate chu anmahni leh an party tlinna tur lam hrilhlawknate a nih phawt chuan, an lo lawm em em a, an ring duh hle bawk. Ticket an hmuh theihna tur leh an tlin theina turin zawlnei intite pan a, an tawngtaisakna diltute pawh an bang lo. Mizoram politics chu zu politics, ui sa politics, sem politics, Centrala rorel lai BJP party inhlauh siakna politics, party member leh hruaitu nihna atanga banna lehkha thehluh leh lawmluh politics, hnamdang pasal neih sawichhiatna politics, hmeichhiate hmusitna politics, kohhran pawl leh hnam nihna lam hawia politics khelh identity politics, quid pro qua politics leh zawlnei intiten inthlannaa tling tur leh tling lo tur inhrilhlawk siakna politics level vel a nihna lai a awm a, Kristian tamna ram leh democracy puitling ram politics thu leh hla atan chuan a ho lam hle a, a lungchhiat thlak hle bawk.
He article ah erawh chuan, inthlannaa tling tur leh tling lo tur hrilhlawknate hi thupui hlapuia lak chi a ni ang em, chutianga hrillawktute chu zawlnei dik an ni ang em tih leh inthlanna chungchanga zawlnei dikte rilru put dan tur leh sawi dan turte sawi zau kan tum dawn a ni.
Thuthlung Hlui hun laiah chauh ni lovin, Thuthlung Thar hunah pawh zawlneite an awm ve. Tirhkoh Pawla chuan, “Tirhkohte leh zâwlneite lungphûm chunga rem in ni, chu lungphûma a kil lung pawimawh ber chu Krista Isua hi a ni,” a ti a (Ephesi 2.20). A sawi zelnaah, “Tin, rinna leh Pathian Fapa hriatna kawngah chuan thu khat vuaa, puitlinga, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân, Krista taksa siam tha tûrin thenkhat chu tirhkoh atân te, thenkhat chu zâwlnei atân te, thenkhat chu Chanchin Tha hriltu atân te, thenkhat chu kohhran châwmtu leh zirtîrtu atân te a pe a,” a ti a (Ephesi 4.11-13). He Bible bung leh changte atang hian, Thuthlung Thar hunah pawh zawlneite an la awm zia kan hmu a ni. Thuthlung Hlui zawlneite chu kan hria a, Thuthlung Thar huna zawlneite chu tute nge an nih, eng rawngbawl hna nge an thawh, tia zawhnate a awm thei.
Thuthlung Hlui zawlneite leh Thuthlung Thar zawlneite hi rawngbawl hna inang thawktute an ni. An rawngbawl hna lairil ber chu, rinna leh Pathian hriatna kawngah puitling a, Krista famkimna kan tawm theina tura Pathian Thu puan, thu hrilh leh zirtir a ni.
Thuthlung Hlui zawlneite thusawi ngun taka kan zir chuan, hrilhlawkna (foretelling) lam an sawi tam ber lo. Hrilhlawkna an sawi chu zaa panga vel chauh a ni a, hrilhlawkna zaa panga vel zingah pawh chuan a chanve vel chu Mesia lo kal tur hrillawkna a ni. An sawi tam ber chu forthtelling a ni a, chu chu ram leh sakhua hruaitute leh mipuite sualna leh thiltih dik lohte hailan a, an sualnate sim tura vaukhang a, Pathian hnenah kir leh tura sawmna te a ni.
Thuthlung Hlui zawlneiten thupui bera an neih chu dikna leh rinawmna a ni a (Amos 5.24, etc), ram leh khawtlangah dikna leh rinawmna a tualleng theihna turin roreltute leh sakhua hruaitute kokiah mawhphurna a nghat lian ber a ni. Tunlai Mizorama zawlnei intite erawh chu, dikna leh rinawmna Pathian Thu tlangaupui leh dinpui aiin inthlannaa tling tur inhrilhlawk siak te an tuipui zawk emaw tih theih tur dinhmunah an ding a ni.
Kum 2020a America (USA) inthlannaah khan, Pu Trumpa tling lo tura hrilhlawktu zawlnei intite an awm a. A han tling lo tak tak mai chu zawlnei dik an nihna fiahtuah an ngai a, an inchhuang hle awm e. Kha inthlannaah khan Pu Trumpa tling lo tura sawitute zingah khan USA leh khawvel dangah te mihring million 80 (nuai za riat) aia tam an awm ang a, chung ho zingah chuan Pathian ringlotute pawh tamtak an tel ang. A nih leh, chung ho zawng zawng chu, ringlotute telin, zawlnei dik an ni vek tihna em mi ni ang? Ni lo ve. Social media, TV, Youtube, chanchinbu, etc leh a boruak atangin an thlir a, tling tur leh tling lo tura an rin thu an sawi mai a ni. Thenkhat chu Pu Trumpa a tlin loh an duh avanga, a tlin lohna tur lamah an sawi uar a, tlin tir loh an tum a ni ber. Nakkum (2024) November thlaa an inthlanna turah pawh Republican Party ticketa ding tur zawnnaah Pu Trumpa chu sang ber a ni leh rih. “Trump’s come back” kum ni tura ringtute tam tak an awm. Chumi karah chuan USA inthlanpui zawlneite an rawn chhuak leh sup sup ang. An awm nual tawh zawk awm e.
Mizoram dinhmun pawh, chu tiang chu kan ni ve. Zawlnei intite hian, an duhsak zawkte an tlin tir a, an duhsak lote chu an tlin tir lo mai a ni. Thenkhat chu Pathian atanga an thu dawn ni lovin, social media, TV, Youtube, chanchinbu, etc leh khawlai titi boruak atangin tling tur leh tling lo turte an hrillawk mai niin a lang. Pathianin tu hnenah mah November thlaa Mizoram inthlanpuia tling tur leh tling lo turte a rawn hrilh a rinawm lo. Pathian inlarna chu inthlanaa tling tur leh tling lo tur puanna level velah kan dah a nih chuan, Pathian nung leh thianghlim chungah pawi khawihna a ni palh thei. A hlauhawm hle. Chuvangin inthlanna zawlnei ten tling tur leh tling lo turte an hrilhlawknate hi thupui hlapuiah lak loh a tha ber ang. Mizoram Kristiante hi, chutiang level rinna aiin kan puitling zawk.
Zawlnei intite inlarna leh hrilhlawkna tamtakte hi chu, Pathian inlarna ni lovin, anmahni suangtuahna, mumang, rin thu leh nih tir duhte ni maiin a lang. Chuvangin an hrilhlawkna zawng zawng hi rin vek tur a ni lo. Inthlannaa tling tur leh tling lo tur hrilhlawkna te phei chu, a rau lem lo, a khawvel tlat. Pathian Thu kan nei a, Pathian Thu anga nung a, Pathian duhzawng tih hi, ringtute tan kan tih makmawh chu a ni.
“Mumang a tam poh leh thu lawilo a tam a ni si a. Pathian chu tih zâwk rawh” (Thuhriltu 5.7). A dik. Pathian hriatna leh tihna neih a, a duhzawng ti tura min hrilhtute leh zirtirtute hi zawlnei rawngbawl hna dik tak thawktute chu an ni. Kan ram inthlannaa zawlnei rawngbawl hna dik chu hei hi a ni: Eirukna leh thil tha lo dangte avangin kan ramin a tuar a, hmasawn tur anga hma kan sawn thei lohna te hailang a, “Inthlanna kan nei leh hunah chuan, Lal Davida ina dikna leh thiamna-in ram a kaihruai ang khan (Sam 78.72), Pathian tihna nen ram tan hmathlir tha nei, corruption do ngam tur mi dik, mi rinawm, mi taima, thawkrim leh ram kalsiam hrethiam leh thiam turte din tir ila, chutiang mite chu i thlang ang u,” tih hi zawlnei thu dik (prophetic message dik) chu a ni. Hetianga thu sawitu pastor, kohhran upa leh ringtu mi dik leh mi rinawmte hi zawlnei dikte chu an ni a, zawlnei rawngbawl hna dik tak thawktute chu an ni.
Roreltute thiltih dik lo hailangtu leh puangtu zawlneite chu roreltute leh an khawnbawlte chuan an lawm lo hle thin. Chuvangin an tiduhdah a, an that hial thin a ni (1 Lalte 28.4; Zeremia 38.1-13, etc). Thuthlung Thar hunah pawh, zawlnei Johana kha roreltu thiltih dik lo a sawi chhuah avangin thah a ni (Mathaia 14.1-12). Chuti chung pawh chuan, Pathian Thu a nih tlat avangin, zawlneite chuan an nunna dahkhamin an rawngbawl hna an thawk chhunzawm zel tho a ni.
Zawlnei Ezekiela hun laia Israel ram dinhmun leh tunlai Mizoram dinhmun hi an inang hle. Ezekiela 22.23-31:
Lalpa chuan heti hian mi hrilh a: “Mihring fapa, Israel-te hi hrilh rawh. An ram chu ram then fai loh a ni a, thinurna ni avânga ruah dawng lo ram a ni. An lalte chu sakeibaknei sa hauh rûm ang an ni; mi an that a, mi sum leh thil hlute an lâksak a, mi tam tak an tihmeithai a ni. An puithiamte chuan ka dân an hmusit a, ka thil thianghlimte an tibawrhbâng a, thianghlim leh thianghlim lo an thliar thei lo va, a thiang leh thiang lo mi an zirtîr thei hek lo. Ka sabat ni an hai der a, an zînga tu mahin min zah lo. An officerte chu chinghne koham, a hmuh apiang seh zêl ang hi an ni: hlâwkna tûr a awm phawt chuan mi thah an tîm lo. An zâwlneite chuan inlârna an hmu der a, dâwt thu hril lâwkin, chinai an hnawih mawi bang ang hian, roreltute, puithiamte leh officerte thiltih dik lohte chu an sawi mawisak a; ka sawi loh pui, ‘Lalpa Pathian chuan heti hian a ti,’ an ti a. Mipuite pawhin mi dang an nêkchêp a, rawk an chîng a, retheite leh pachhiate an tiduhdah a, ram dang mite dik lo takin an hnehchhiah a. Thinura ram chu ka tihchhiat vek loh nân a bang chim rem tha tûr, a chhe laia lo tang tûr mi, an zîngah ka zawng a, ka hmu zo hauh lo. Chuvângin, ka thinurna an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dâwn a ni,” Lalpa Pathian thuchhuak chuan a ti. (Mizo Common Language Version leh ziaktu lehlin dan pawlh a ni.)
Hmanlai Israel rama lalte kha tunlai Mizoram dinhmunah chuan politiciante leh roreltute hi an ni ang a; puithiamte chu pastor leh kohhran upate hi an ni ang a; officerte chu officer kan neihte hi an ni ang a, zau zawka sawi chuan eiru ching sawrkar hnathawhte pawh a huam ve ang. Zawlneite chu tunlaia zawlnei intite leh thuhriltute (evangesist-te) hi an ni ang a, mipui chu mipui (contractor, dawrkai, sumdawng, company leh factory nei, kut hnathawh, etc te) te hi an ni ang. Tunlai kan ram dinhmun enin, engkim chhe vek lo mah se, a chhe lai tamtak a awm. Ezekiela lehkhabua kan hmuh angin, kan zavaiin a mawh kan phur a ni. Chutihrualin, sawi tawh angin, roreltute kokiah a mawhphurna a innghat lian ber a ni.
Chuvangin a chhe lai siamtha turin, Pathian leh ram inkara ding tlat a, ram tana malsawmna min nih sak tur leh hmasawnna min thlen tur roreltu mi dik leh mi rinawm te kan mamawh a ni. Chutiangmi roreltute kan neih theihna turin tawngtai ila, chutianga rorel thei tura kan rin leh kan hriatte chu din tir ila, i thlang ang u. Hei hi inthlannaa zawlnei rawngbawl hna dik tak chu a ni e.