Myanmar sipai sorkar Buddhist puithiam (monk) thawm na tak, ram tana na taka che thin leh Muslim huatna lam sawi fo tawh thin, Ashin Wirathu chu tan in atangin a chhuah.
Wirathu-a hi February thlaa sipaiten an paih thlak tak, mipui sorkar do zawnga khawsaa puha man a ni a. Sipai lam tan zawnga a khawsak nasat thin avanga hriat hlawh a ni.
‘Buddhist Bin Laden’ ti hiala Muslim-te a beih nasat thin avanga an sawi a ni a, a bik takin Rohingya hnam tan a hnawk zual.
Tun hnai kum eng emaw ti chhung pawh khan sipai thlawpna lam thiltihnaah a inlan fo va, hetih hun laia an ram hruaitu, Aung San Suu Kyi leh a kaihhruai, National League for Democracy sorkar chu a sawisel fo tawh thin.
Kum 2019 khan mipui sorkar huat zawng leh tihchhiat tuma puha man tum a ni a. A tlanchhia a; mahse, November thlaah a inpe zui a, tun thlengin a chungthu rel a la ni lo.
Thawhtanni khan sipai sorkar chuan an puhna zawng zawng chu hnawl a nih thu a puang a, a chhan erawh engmah an sawi lo.
Sipai damdawi inah inenkawl tura a awm thu an sawi tel a, Wirathu-a hriselna dinhmun hi engnge tih erawh hriat chian a ni lo.