Aam Aadmi Party (AAP) Mizoram hruaitute chuan nimin khan Aizawl Press Club-ah thuthar thehdarhtute an kawm a, Mizorama sorkar an siam hunah sorkar hnuaia inziak lut contractor-te chauhin hna an thawk dawn tih an sawi.
AAP hruaitute chuan sorkarna an siam huna an hmalakna tur, an policy thenkhat thuthar thehdarhtute hmaah puangin contract hna, dan dik taka a kal theih nan contract hna hralhchhawn khap a nih tur thu te, party worker-te contract hna thawhtir an ni dawn lo tih te an sawi.
Restricted tender chungchangah chhan dik tak loah chuan tih a ni ngai dawn lo tih sawiin, contract hnaah MLA, minister leh sorkar hotu liante zingah share nei ru an awma hriat a nih chuan chhuichhuaha hrem zel an ni dawn tih an sawi.
Sorkar hnathawkte lakah inthununna kenkawh an tum dawnte sawi bawkin, NGO leh pawl hrang hrang bakah kohhran rawngbawlna chhuanlama an hna thawk tha lo leh kal tha lo te, eiru te, hnaa hun vawng dik lo, aikal la, mahni posting-na hmuna awm tha duh lote chu an en liam mai mai dawn lo a, hremna lek kawh a ni dawn tih an sawi.
AAP Mizoram chuan sorkar hnathawk transfer & posting chungchangah posting chu rotation wise-a kalpui an tum thu te, mahni khuaa thawk duh erawh an khuaah post-tir an ni dawn tihte an sawi bakah sorkarna fawng vuantu minister/MLA-te an thu hlur dawn lo a, mahni thuneihna ang zela thawkin minister-ten hna an vil mai thin dawn tih an sawi bawk a ni.