- Ngaihzâwng neih remti lo
K-Pop fan te hi a tlangpuin tleirawl te te, rilru lama la puitling tâwk lo, rilru nâ hma leh thikthu chhe tak tak an nih thin avangin K-pop star, a bik takin hmeichhia phei chu an mimal nun thlenga khuahkhirh nasat an ni. Thenkhat phei chu contract an ziahah, ‘No dating’ tih a tel. Mipa tan pawh bialnu nei lo tura hriattir vek an ni a, an thil tum tih-hlawhtlinna kawngah an rilru leh ngaihtuahna la peng thei laka inserhhrang tura beisei vek an ni. Dan zawm thei bik lo pawh an awm tho. Tun thla tir lam khan EXO member Chen chuan ngaihtuahna nasa tak a sen hnu-ah thu-tlukna harsa tak a siam a, a fa pai mek a bialnu chu nupuiah a nei dawn, tih a puang.
- An taksa anpui ni lo te nena len vel phal lo
Ngaihzâwng neih an phalsak viau loh lai hian an taksa anpui ni lem lo te nena awmho a, len kual vel te hi thil remchang a ni lo bur bawk. K-Pop star hlui, tuna YouTube-a lar leh mek Grazy Grace chuan mipa dang- trainees emaw idol ang te biak a, an bula awm ringawt pawh an remti ngai lova, a hrana awm tura hriattir thin an nih thu a sawi. An mahni anga milar dang te pawh ni se, zinna ah emaw puipunna hmun ah reng reng an inhnimhnai theih lohna turin management company lamin ngaihtuahna an sêng ngat ngat thin.
- Landan uluk a, fimkhur ngai
Dawhsanah an mahni style bik an nei tur a ni a, sam colorful an neih hi him taka an vawn reng a ngai. An inbel dan te thlengin, hotute remtihna leh pawmpuithlap a nih vek a ngai bawk. A tlangpuiin an awmna management company-in an thlansak thin. Phalna leh remtihna la lova duhzawng lo hak ve ngawt leh inpenparh vel kha dan kalh a ni a, a vuak let a na hle. Inchei duh dan leh lan dan te hi mimal thil a nih rualin, K-Pop star te erawh chuan an chang pha ve lo. An inchei dan hi management kutah a awm tawp mai a ni.
- Tattoo langsar leh hmuh theih a awm thiang lo
K-Pop star te lan dan leh mipuiin an hmuh duh dan hi lang fresh tak, thianghlim leh mit la tak tur a nih avangin tattoo langsar leh hmuh theih tura pholan hi a rem lo. Ta-ttoo nei an awm tho na a, tilang lo tur leh thup vek tura hriattir an ni a, Post Malone-a hmaia tattoo khat deuh titih te hi American rapper en-kawltu management tan har-satna awm lo mah se, Korean ho enkawlna hnuaiah chuan enliam theih a ni lo bur.
- Tui tihzâwng ei vak vak thiang lo
K-Pop star te nuna hah-thlak leh hrehawma ber mai chu ei leh in chungchang a ni a, khauh taka engkim kalpui a nih avang leh taksa rihna vawn reng ngai bawk, thau thiang lo bawk nen, an mahni nun ngeiah pawh an mahniah thuneihna pakhatmah an nei lo. Company lamin an rih dan tur bituk a siam an vawn reng a ngai a, an endik sak thin. Kg 2-1 lek lo rih belh te hi thil pawi tak a tling thei a, inhrawkna leh na tak taka inhauh buaina a chochhuak nghal vat thei.
- Hna dang thawh a rem lo
K-Pop star lar bik te tan buaina a awm loh laiin, lar tak ni lo tan hlawh a tlêm a, senso a hautak tho bawk si a, a luhaithlak thin hle. Hna dang thawh ngai an awm fo a, inthlahrun a nâ a, star an nihna kawng kal zel turah daltu a lo ni thei bawk nen, an nun a hrehawm hle. Chuvang chuan, lar ngei ngei a ngai a, lar tawh hnu ah hna thawh a rem bawk si lova, K-pop star te hi engemaw thuta an hna atanga ban emaw thlawn palh chuan hna dang zawn buai a ngai leh tho si a, inveng reng renga awm a ngai a, an nun hi a tawt ngawih ngawih.
- Mobile phone check sak thin
Mimal thil angin lang mah se, an mahni enkawltu company tan an nau te ho phone check sak hi tih ngei ngei tur a ni thung. An duh dan leh an intiam ang ngeia an awm a ngai a, chumi tihhlawhtlinna kawng pakhatah mobile phone check sak hi a langsar. An duh hun hun ah an check a, tul an tih huna an mobile phone an entir thlap thlatp a ngai. Anni lamin dan an zawm leh zawm loh an en thei bawk a, an inphuarna hrual hrui hi a nghet em mai a, zalen taka thâwk lak veng veng te hi K-pop star tan chuan Van a rah ang a ni fo.