Australia chhim chhak lam chu magnitude 5.9-a na lirnghingin a sawi a, Melbourne khawpuiah chuan in eng emaw zat a chhia.
Lir hi an ram sanaa Nilaini zing 9:15 (zing dar 4:45)-a Mansfield atanga intan a ni a, a intanna hi Victorian state khawpui atang hian a hla lo hle.
Prime Minister Scott Morrison chuan hliam tuar na an la dawn loh thu a sawi a, ‘chanchin lawmawm tak’ a nih thu a sawi bawk.
Lirnghing hi an state thenawm pahnih, South Australia and New South Wales (NSW)-ah pawh hriat a ni.
Nghing nawn (aftershock) vawi hnih, magnitute 4.0 leh 3.1-a nain a sawi zui leh bawk.
Nilainia lirnghing hi tun hnai kum eng emaw zat chhunga Australia-a lirnghing na ber pakhat a ni a, chhiatna liantham tak erawh a thlen lo hlauh thung.
United States atangin Morrison chuan lirnghing chu Australia-ah chuan a tam loh thu leh mi tam tak a tihbuai thu a sawi.
Victoria-a State Emergency Service chuan mipuite chu aftershock thleng leh thei a nih avangin inring turin an hriattir.
“Victoria-a i awm a nih chuan hlauhawmah i awm mek a. Aftershock a thlen a rinawm a, in chhia leh derthawng bul hnaiah awm lo la, rikrum thil a nih loh chuan lirthei khalh chhuak lo hram ang che,” an ti.
In chhawng sang leh damdawi ina awmte chu hun rei vak loh chhung hmun himah suan chhuah an ni a. Khawpuia rel tlan (tram)-te pawh chhia a awm nual avangin tihdin a ni bawk.
South Australia Premier Stephen Marshall chuan an state-ah aftershock a thleng nual tih a sawi.
MP pakhat, Michael McCormack chuan chuan Wagga Wagga, NSW-ah chuan lei a insawi hlawk hlawk niin a sawi.
Australia-ah hian lirnghing liantham hi a thleng tam lo hle a, hei hi an khawmualpui hi tectonic plate lai vel taka a awm vang a ni.
Tun tuma nghing hi lei hnuai km 10-a thuk atanga intan niin Geosciences Australia chuan a sawi a. A tirah magnitude 6.0 an ti zet a, 5.9 a nih zawk thu an sawi leh.
Geoscience agency-te chuan Australia hian thil tichhe thei lirnghing a tawng thei reng niin an sawi ve bawk a, kum 10 dan velah magnitude 6.0 vela na a thleng ziah thei niin an sawi.
Melbourne khawpui hi Australia-a khawpui lian ber pahnihna niin mi maktaduai nga chuang an cheng.
Tun hnaiah coronavirus kai an pun thar leh avangin an inkharkhip mek nghe nghe.