Mizoram Excise & Narcotics Department chuan Myanmar refugee camp-a khawsa mek nia inchhal hnen atangin methamphetamine kg 4 an man.
Excise & Narcotics Department chuan ningani zan dar 10:45 khan Khuangi Lungdawh Champhai District-ah Methamphetamine (Crystal Meth) Kg 4.000 leh a neitu nia puh – Lalrinzauva (33) Bualte, Falam, Myanmar, tuna Zokhawthar-a Bethel Refugee Camp-a khawsa mek nia in chhal chu an man.
Crystal Meth manchhuahnaah hian Excise force te chu Anti Drugs Squad, Champhai Sub-Headquarters YMA-in nasa takin an tawiawm a; heng Crystal Meth te hi Myanmar atanga lak, Mizoram state pawna hralh tum mek lai a ni.
Excise & Narcotics Department leh 42 Assam Rifles te thawkdun chuan nizan vek khan Champhai to Aizawl Road (Chhungte khaw dai)-ah heroin gram 107 & mg 780 (Hawng 8) leh a neitu nia puh – Lalsangliana (31) Electric Veng, Champhai-a khawsa nia inchhal chu an man bawk.
Ruihhlo an kawl avanga mante hi The Narcotics Drugs & Psychotropic Substances Act, 1985 (NDPS Act) tlawhchhanin thubuai siamsak an ni.