Arsenal captain Martin Odegaard chuan kum nga contract thar a club-ah a ziak.
Kum 24 mi Norway midfielder hian Gunners tan vawi 112 inkhel tawhin goal 27 a khung bakah midang goal khung tur vawi 15 a siamsak tawh a. Mikel Arteta team-ah hian player pawimawh ber zinga tel ngei a ni.
Odegaard hian Pound maktaduai 30 in kum 2021 August thla khan Real Madrid atangin Gunners hi a nghetin a zawm a, hemi hma hian loan in Emirates Stadium-ah hian a lo khel tawh.
Season liamta khan Premier League match 38 an khelh atangin vawi 37 a inlan a. League a pahnihna an nihna kawngah team kaihruaitu leh khelmual chhunga an khawpui berah a tang fo thin.
“Chhan hrang hrang avang te in contract thar ziah hi ka tan thutlukna siam awlsam tak a ni.” Odegaard chuan a ti a.
“Tuna kan club a kan team din mek hi chhan lian tak a ni a, he team tha kan din mekah hian tel chhunzawm zel ka duh. Kan hmalama thil min hmuakten min ti phur a, hmabak eng tak kan nei.”
“Ka tlaktlumna tak team leh ka pawimawhna team ka hmu a ni.” tiin a sawi.
Norway tana vawi 53 khel tawh Odegaard hi an ram tan pawh a captain a ni a, a contract thar ziah avang hian2027-28 season thleng Arsenal tan a inkhel dawn a ni.
Tun season-ah Arsenal tan vawi sarih inkhel tawhin goal thum a khung tawh a. Manager Arteta chuan, “Martin-a’n contract thar a ziak hi Arsenal nena inzawmna nei zawng zawng tan chuan chanchin lawmawm tak a ni.”
“Kan captain a ni a, kan club-ah hian hmahruaitu pawimawh niin player zah hlawh tak a ni. Professional nihna kawngah a entawn tlak a, theihna sang leh puitlinna te a nei.” a ti.