Liverpool in UEFA Europa League-ah hnehna nen bul an tan a, goal chhuah hmasa zawkah tang mahse 3-1 in LASK Linz lakah an chak.

Austria a Linz khua a Raiffeisen Arena a inkhelah hian LASK midfielder Florian Flecker chuan minute 19-naah goal mawi penalty area hmawr atangin Austrian club tan a khung a. Liverpool an barakhaih.

Jurgen Klopp-a’n Wolverhampton Wanderers hnehtu team chu thlak hlawkin team a tidanglam a, hei hian an inkhel a nghawng.

First half-ah kum 2016 final hnua an Europa League khelh leh hmasak berah Liverpool in beisei an pha lo.

Second half-ah erawh insiamremin an kheltha sawt a, Luis Diaz chuan penalty hlawhchhuakin Darwin Nunez-a’n goal-ah a khung a. Ryan Gravenberch siamsak atangin Diaz-a’n goal khungin second half substitute Mohamed Salah chuan an goal thumna a khung leh bawk.

Hnehna an chan avangin Klopp-a hi Liverpool manager zinga Europe huap inelna a vawi 50 hnehna chang tling hmasa ber a ni.

Inkhel dang

Europe Conference League champion lai West Ham United in Europa League group stage a an match hmasa berah 3-1 in TSC Backa Topola chu an hneh.

London Stadium-ah hian Hammers in Serbian club lakah hian goal an khung mai lova, second half-ah Petar Stanic chuan an lamah goal a khung zawk.

Mahse Hammers in Nemanja Petrovic own goal an neih bakah Mohammed Kudus leh Tomas Soucek ten an khung a, James Ward-Prowse-a siamsak ve ve an ni.

Premier League a fak hlawh Brighton in Europe huap inelnaah bul an tan fuh lova, tum thum si phur zawkah tangin 3-2 in Greek club AEK Athens lakah an tlawm.