Kum 2023 Formula One season an thunun hneh a, intlansiak paruk hmabak la awm mahse Red Bull Racing chu contructors’ champion an ni tawh. Japanese Grand Prix-ah Max Verstappen chu pakhatna niin a vawi rukna atan constructors’ title hi an la.
Pathianni zingah Japan a Suzuka International Racing Course-ah intlansiak neih a ni a. F1 chanchin a driver-te thiamna a lansarhna berte zing ami tia an sawina thin tlankawngah Dutch driver a chungnung. Zirtawpni practice atang tawhin engkimah a tlanchak fal a, a car that leh a theihna sang inkawp chu tu tan mah um tak tak theih a ni lo. Lap 53 intlansiakah second 19 chuangin hnehna a chang.
McLaren driver pahnih Lando Norris leh Oscar Piastri ten pahnihna leh pathumna an luah a. Piastri hian F1 a a season hmasa berah dawhsan a vawikhat lawnna a ni a. A teammate Norris hi tun season-ah Verstappen tih lova dawhsan lawn hnem ber a ni ve thung.
Red Bull an chungnung
Qualifying-ah Verstappen hi amah hnaih bertu Piastri aiin second 0.581 in a tlanchak zawk a. Hei hi F1 huangah chuan lap khat tlan zawh theih zawngah inthlau tak a ni.
Intlansiak bul tanah Norris leh Piastri ten Dutch driver hi nawr viau mahse kawi hnihna an thlenin midang a tlansan tan a, umphak a ni leh tawh lo.
Tun kartawpah McLaren car te hi Red Bull car te um thei ber tura ngaih an ni a, anni pawhin an tibuai pha lo.
Red Bull Racing driver dang Sergio Perez tan intlansiak duhawm a ni lova. A tan tir lamah an intai a, a hnuah hremna vawi hnih dawng leh bawkin a tlan zo lo. Hetihlai hian a hremna hmuhte hmang zo tura tlan that leh an phalsak chuan sawizui a hlawh hle.
Perez-a’n point a hmu miah lo chungin Verstappen-a’n an mamawh ang point a nei thei a. Hei hian season tluan a an chungnunzia a tilang.
Red Bull Racing hian kum 2010 atanga 2014 inkar khan a zawnin vawi li an champion tawh a, nikum khat kum riat hnuah an champion leh a ni.
Red Bull team principal Christian Horner chuan, “Kan season hman ang khum hi chu thil harsa a ni tawh ang. Hun duhawm kan hmang a, hei vang hian kal zel kan tum ang. Mahse F1 chu a danglam chak a, tu tan mah hetiang hian a kal reng theih loh tih a lang thin.” tiin a sawi.
